Vikings hneh kan tum - TBL coach

Zanin dar 8:00 hian Khatla TBL leh Chanmari Vikings an inhmachhawn dawn. TBL coach Vanlalnunsanga chuan tun hnaia khel ṭha tak Vikings chu hneh ngei an tum thu Vanglaini a hrilh.

Team ṭha, mahse beisei anga bul ṭan fuh lo pahnih an ni a, zanin an inkhel tur hi a pawimawh dawn. A chak lo tan 'Play In' a hla sawt thei, a bik takin pangana ni lai Vikings tan chak loh a pawi zual ang.

MSL vawi hnih champion tawh TBL coach Lana chuan, "Kan player zingah Rinmuanpuia Chhangte leh Moses Lalchhuanawma te chu hliam vangin an khel thei dawn lo, kan ṭhat dan berin khel thei lo mah ila Vikings hneh ngei tumin kan bei dawn," tiin a sawi.

Khatla TBL hian Punjab mi Arvindar Singh pawh an chhawr thei dawn lo a, United States aṭanga an chah luh Levi Bradley Jr. erawh a inpeih. Bradley hian match khatah point a nei ṭeuh ngai lo, mahse team tana khel a nihna hi an ṭangkaipui ṭhin viau.

TBL coach Lana chuan sawi zawmin, "Season dangah hian mimala che ṭha tak tak kan nei tawh ṭhin, mahse match ṭhenkhatah min chakpui thei lo. Tun season-ah erawh point nei thei bakah a venhim lam thlenga ṭang thei kan nei hi a lawmawm," a ti.

An hmachhawn tur Vikings hi tun hnuah an harh, match hnih an tlawm hniah a zawnin vawi hnih an chak ve leh ta. Coach H. Lalhruaitluanga'n inrintawkna an nei leh ta chu lawmawm a tih thu a lo sawi tawh a, team ṭha TBL lakah eng ang tak nge an nih chu fiah a ni dawn.