Chelsea-in Sterling lakluh an duh

Nipui football transfer-ah thawm ngaihnawm hriat tur a awm chho zel a, Chelsea chuan Manchester City-a tlatlum lo Raheem Sterling lakluh an duh.

City chuan Sterling hi chhuah a duh avangin hralh an pawi ti lo nia sawi a ni a, mahse, Premier League champion hian pound maktaduai 50-60 inkar tal hmuh an inbeisei niin khawthlang media-ten an tarlang.

Chelsea hian an striker Romelu Lukaku chu Inter Milan lamah loan-a kirtir an tum mek bawk a, Belgian striker a chhuah ngei a rinawm avangin forward an mamawh lehzual.

Pep Guardiola enkawl team hian Sterling bakah Gabriel Jesus, Ilkay Gundogan, Oleksandr Zinchenko leh Bernardo Silva an chhuahtir dawn nia sawi a awm bawk.

In duh chuan...
City hian kalphung nghet tak an nei a, player-ten chhuah an duh chuan an dal ngai lo - Sterling pawh hi season hmasaa chhuak tur anga ngaih zawk kha a ni tawh a, mahse, Euro 2020 ṭha taka a hman avangin Etihad Stadium-ah a cham.

Mahse, beisei anga City tan hmun a chan tam tawk loh avangin Sterling-a'n bench-a a ṭhutna lama a mawng kham a ning tawh a, chhuahna tur a dap.

Premier League club ni lo zingah Sterling lakluh duh an awm nual nia sawi a ni a, mahse, London-a piang forward hian an khaw club Chelsea tana khelh hi a duh niin an sawi.

Sterling hian a hmelhriat hnai leh a ngamtlakte chu Chelsea chungchang a zawt nual tawh niin an sawi a, manager atana Thomas Tuchel hrawn a nawm leh nawm loh thu thlengin a ṭhiante a zawt tawh.

A dangtu
Sterling-a'n chhuah a duh a, Chelsea a pan hreh lo a, Pep-a'n chhuahtir a pawi ti lo bawk - mahse, English champion-in a man an chhiar zat hi Blues tan thehchhuah phal a harsa mai thei.

English forward hi kum 27 mi chauh a la ni a, City tan inelna hrang hrangah match 339 khelin goal 131 a khungsak a, assist vawi 95 a nei - Premier League (4), FA Cup (1), League Cup (4) leh Community Shield-ah a champion pui tawh bawk.

Season hman zawh takah pawh inelna hrang hrangah match 47 khelin goal 17 a khung a, assist vawi kua a nei - a inlan zingah vawi 15 chu bench aṭanga luhtir a ni a, vawi riat lakchhuah a ni bawk. Khelmuala hun a hman tam loh ngaihtuaha a record hi ropui tak a ni.

A sulhnu leh theihna enin Sterling manah City hian pound maktaduai 50 tal an phut a nih pawhin a awm ngawih ngawih. Mahse, Etihad Stadium-ah kum khat chiah contract a nei tawh a, chhuah duh a ni bawk tih hi Chelsea lamin an hre ve kar - man tlawm zawka lei theih an inbeisei tlat.

Pakhat zela an kal boin...
City hian Sterling ringawt an chhuahtir dawn lo - tuna chhuak tur thawm nei ring tak chu Gabriel Jesus a ni a, Brazilian forward pawh hi Chelsea-in duh tho mah se Arsenal nen an inhnaih zawka sawi a ni.

City chuan Jesus manah hian £50mtd an beisei niin khawthlang media-ten an tarlang a, kum 25 chauh a nih bakah City tan Premier League (4), FA Cup (1), League Cup (3) leh Community Shield (2) nomawi a chawi tawh bawk.

Manchester khaw club tan hian season hman zawh takah khan match 41 khelin goal 13 a khung a, assist vawi 12 a nei bawk - a man zat atana City lamin an phut zat hi a phu viau niin a lang.

Hetihlai hian Tottenham Hotspur chuan tun hnaiah Jesus duhin thawm an rawn nei ve bawk a, Champions League khel tur an nih avangin Arsenal pek theih loh an pe thei dawn - Jesus pan lam tur rinthiam a harsa.

Mangṭha Silva?
Premier League-a City an champion theih nana tha thawhhlawk tak Ilkay Gundogan chu Arsenal, Bayern Munich leh AS Roma nen sawizawm a ni a, Ukrainian defender Oleksandr Zinchenko chu Everton, Arsenal leh West Ham nen sawizawm an ni bawk.

Hetihlai hian City player langsar ber pawl Bernardo Silva pawhin Barcelona tana a khelh châkna a la thlah thei lo a, Portuguese midfielder hian Catalan club tana khelh a duh.

Mahse, season hman zawh taka City tana goal 13 leh assist vawi sarih neitu Silva hi English club hian pound maktaduai 75 aia tlawm chuan an chhuahtir a rinawm lo a, suma talbuai mek Barca hian player pakhat lakluh nan heti zat sum hi an theh chhuak thei ang em, tih chu zawhna a ni.

City hian chhuak thei dinhmuna ding player ngah viau mah se Erling Haaland leh Julian Alvarez an lalut tawh a, Leeds United midfielder Kalvin Phillips leh Brighton & Hove Albion left back Marc Cucurella lakluh an tum bawk.

Chelsea hi...
"Chhura duh loh Naa'n nei nang e," tiin Chelsea-in City duh loh Sterling chan an tum a, hetihlai hian season hmasa ṭan dawna man to taka an lakluh Romelu Lukaku chu a club hlui Inter Milan lamah a kal dawn niin an sawi.

Kum 29 mi striker hian season hman zawh takah khan Blues tan inelna hrang hrangah match 44 khelin goal 15 a khung a, assist vawi hnih a nei bawk - £97.5mtd man thawhchhuah atan chuan a ropui tawk lo.

Chelsea hian Lukaku hi loan-a an chhuahtir dawn a nih chuan a hawh manah £10mtd tal dawn an inbeisei dawn a, chutihrual chuan a kar khat hlawh £325,000 chu an tum ṭhen a ngai dawn thung.

Blues hian Ousmane Dembele pawh beisei mah se Barcelona forward inhliam ngun lutuk chu an buaina a ni a, RB Leipzig forward Christopher Nkunku pawh beisei mah se Manchester United leh Paris Saint-Germain nen inchuh huam a ngai dawn.