West Ham-in Nayef Aguerd an la

Season duhawm tak hmangtu West Ham-in season thar pawh ṭha taka hman an tum tih transfer bazar-ah an lantir a, Rennes defender Nayef Aguerd chu pound maktaduai 30-in an lalut - nimin tlai khan Premier League club hian an lakluh thu an puang.

Kum 26 mi Aguerd hian social media lamah chuan Rennes fan-te thlahna thu a tarlang fel tawh bawk a, French club chhuahsan harsa a tih thu te, a cham chhunga hun nuam tak a hman thu a lo sawi tawh a ni.

Morocco tana vawi 25 inlan tawh Aguerd hian season hman zawh takah khan Rennes tan inelna hrang hrangah match 40 khelin goal li a khung a, assist vawi thum a nei bawk.

Hammers boss David Moyes chuan an club chu season thara top six tal ni turin ruahmanna a siam a, an tumte tihlawhtling turin Aguerd lam hi hawina hmasaah a thlang a ni.

Premier League-ah Manchester City, Liverpool, Chelsea, Tottenham Hotspur, Arsenal leh Manchester United an awm avangin top six-a awm ringawt pawh thil harsa a ni a, West Ham hi season hman zawh takah khan pasarihna niin, parukna Red Devils chu point hnih chiahin an phak lo.

Kum 2020-a French club Dijon aṭanga Rennes pantu defender Aguerd hian nimin khan Hammers-ah hian medical a nei a, a paltlang hnuah kum nga chhung atan contract a ziak a ni.

Aguerd-a'n pound maktaduai 30-a Hammers a zawm takah chuan Sebastien Haller (£45mtd), Felipe Anderson (£36mtd) leh Kurt Zouma (£29.8mtd) te zinga a hming ziak kaiin, Hammers player man to zingah a tel - pressure a na sawt ang.