Real-in Rudiger an tlangzarh

Real Madrid chuan nimin khan Antonio Rudiger chu a jersey number hak tur 22 nen an pholang a, club president Florentino Pérez-a'n an defender thar hi a tlangzarh. Germany international defender Rudiger hian Chelsea-ah a contract hmang zoin free transfer-in Los Blancos hi a zawm a, kum li daih contract a ziak.

Real president Pérez chuan, "Khawvel defender ṭha ber zinga mi, match tina a theihna zawng zawng chhuah tur player-in club sulhnu ropui tak nei hi a rawn zawm," tiin team ti ṭha thei tur player an lakluh thu a sawi.

Germany international hian 2017 khan AS Roma aṭangin Chelsea hi a zawm. Blues lamin a contract hi pawhsei an tum ṭhin a, mahse an inrem theih loh avangin European champion hi a zawm ta zawk.

Premier League club tan hian match 203 a khel hman, goal 12 khungin - FA Cup, Champions League, Europa League, UEFA Super Cup leh Club World Cup te a chawipui hman a ni.

Ruidger chuan, "Kei leh ka chhungte tan ni pawimawh a ni a, club tan ka theihna zawng zawng ka chhuah ang a, nomawi chawi theih zawng zawng lakpui ka tum ang. Hala Madrid," tiin chona thar hmachhawn tura a phur thu a sawi.