Quartararo umphak an awm lo

Fabio Quartararo-a'n MotoGP champion lai a nihna a takin a pholang leh ta. Yamaha rider hian Pathianni zan khan German Grand Prix-ah hnehna a chang a, rider championship-ah point 34 zetin hma a hruai fal ta.

Intlansiak tirah Quartararo hi a che fuh, pahnihna aṭangin tlan ṭan mah se a hmasa bera tlan Francesco Bagnaia a lehpel nghal a, lap thum hnuah Italian rider Bagnaia hi a chetsual zui avangin Quartararo tan buaina leh harsatna lian tak tawh tur a awm lo.

Kum 23 mi Quartararo chuan, "Kar tawpah khan ka khua a sik a, intlansiak lai pawh khan ka khuh bawk. Vanneih tlak takin hnehna ka chang ni maiin ka hria, ka lawm takzet zet a ni. Tyre hman tur kan thlang dik a, thutlukna siam fuh hi a pawimawh ṭhin," a ti.

Sachsenring tlankawng hi Marc Marquez rorelna hmun a ni ṭhin, 2012 khan Dani Pedrosa a chak ve zuai. Chumi bakah chuan Marquez awm chinah Quartararo hi chak leh thei hmasa a ni a, tun hnaiah erawh hripui leng vanga inelna neih theih loh ṭum an ni bawk.

June thlatir lama tlan Catalan MotoGP-ah Quartararo hi a lo chak tawh bawk a, tunah a zawnin a chak. Tun kar tawp hian Assen-ah Dutch MotoGP an tlan leh dawn, chumi hnuah chuan nipui chawlh an hmang chhunzawm rih ang.

French tlangval Quartararo chuan, "Championship lam chu sawi theih a la ni lo, a tam thei ang berah erawh chak ka tum. Tunah chuan Assen lama inelna neih tur ka ngaihtuah phawt dawn. Title chu October thla vela sawi chi chauh a ni," tiin a sawi.