India leh South Africa an inhnehtawk

Ruahsur vangin India leh South Africa chuan T20 series match nga an khelh tura a hnuhnung ber an khel thei lo a, 2-2 in an inhnehtawk. India bowler Bhuvneshwar Kumar chu man of the series a thlan a ni.

Match hnuhnung ber hi M Chinnaswamy Stadium, Bengaluru-a khelh tura ruahman a ni a, South Africa hian vawm hmasak thlangin India-in over 3.3 lekah 28/2 runs siam hman mah se ruahsur vangin inkhel tihtawp a ni.

Mikhual Proteas hian match hmasa pahnihah hnehna an chang a, Rishabh Pant-a captain-na hnuaia khel India-in mahni muala tlawm duh loin match hnihah hnehna an chang.

Saurashtra Cricket Association Stadium-a match lina an khelh ṭumin India hian 82 runs-in hnehna an chang a, Dinesh Karthik chanchin in sawizui a hlawh. Kum 37 mi Karthik hian 55 runs siamin man of the match-ah a thlang.

India cricket legend Sunil Gavaskar chuan, "DK hi a kum en suh u. Melbourne zin tura a tel loh chuan a mak khawp ang," tiin October thlaa T20 World Cup neih hunah Karthik hi tel ngei tura a duh thu a sawi.