Haaland thlakna tur Haller

Borussia Dortmund chuan Sebastien Haller lakluh an tum a, German club hian Ajax an dawr tawh. Dortmund hian Haller manah hian pound maktaduai 33 bakah a chet ṭhat dan a zira pawisa pek belh an inhuam niin Dutch journalist Mike Verweij chuan a sawi.

Kum 27 mi Haller hian July 2019 khan Eintracht Frankfurt aṭangin West Ham a zawm a, a man hi pound maktaduai 45 thlenga pung thei a nih avangin Hammers player lakluh tawha manto ber a ni. London club-ah Haller-a'n beisei a pha lo a, Ajax-in pound maktaduai 18.8-in an lalut.

Ajax-ah Haller hian a theihna tak a lantir a, season liam ta khan goal league-ah goal 21 a khung bakah Champions League-ah goal 11 a khung a, season ṭha tak a hmang. Ivorian forward leh Dortmund hi mimal contract chungchangah chuan buaina an nei lo niin sawi a ni a, German club hi a zawm a rinawm hle.

Dortmund hian an player pawimawh zingah Erling Haaland bakah Dan-Axel Zagadou leh Axel Witsel te an chan tawh. Chutihrualin German club hian Niklas Sule, Nico Schlotterbeck, Karim Adeyemi leh Salih Ozcan te an lalut tawh a, season thara Bayern Munich elphak ngei tumin an inthuam ṭha mek.