VAR-in Premier League champion a chelh

Liverpool-in Brighton & Hove Albion lakah goal thum an khung a, video assistant referee hman a nih avangin goal khat chauh pawmsak an ni. 

Reds hian VAR hmangin hun pek belhah penalty an chawi zui a, VAR vanga goal pawmsak loh kha VAR vangin an lamah goal a lut ta thung.

Brighton khelmualah Moha-med Salah, Diogo Jota leh Sadio Mane ten goal an khung ṭheuh a, Jota goal khung chiah pawmsak a ni thung. 

Hun pek belhah Brighton tan Pascal Gross chuan penalty a chhuih lut a, Liverpool tan goal dang khungna hun a awm tawh lo - Reds an chak zo lo a, inkhel result chu 1-1 a ni. 

Liverpool hian Thawhlehni zanah Champions League match khel turin Ajax an mikhual zui ang a, December 6 zanah Wolver-hampton Wanderers chu Premier League-ah an mikhual ang.

Brighton-in an khelmualah Liverpool hlauh an tum lo a, goal khung an tum ngam -  khel ṭha em em mai Aaron Connolly chuan Neco Williams lakah penalty a hlawh chhuak a, a pet turin Neal Maupay-a lo pen chhuak. 

Mahse, French striker hian Liverpool laka hmahruaina remchang an neih chu goal-ah a chantir thei lo a, Reds an vannei - Maupay hi hliam vangin thlak a ngai zui a, a tan chuan zan duhawm lo a ni. 

Liverpool tan Mohamed Salah chuan Roberto Firmino ball siamsak hmangin goal-a khungah a inngai a, mahse Egyptian forward goal khung hi VAR hmanga ennawn a nih hnuah pawmsak a ni lo. 

Referee thutlukna enin a 'tight' takzet a, Maupay-a penalty chhuih luh loh vanga vannei team kha an vanduai ta thung. 

Minute 60-naah Liverpool dan reng theih an ni tawh lo - Salah ball siamsak chu Diogo Jota chuan khalh lutin defender pahnih a bum a, mawi zetin goal-ah a chantir. 

Kum 23 mi forward hian Liverpool-a pan hnuah Reds tan match 14 khelin goal kua zet a khung tawh a, heng zinga goal riat chu a match hnuhnung pariat aṭanga a khung a ni. 

Jota goal khung hmangin Liverpool hi an chak mai a rinawm a, bench aṭanga luhtir Mane chuan a belhchhah - mahse Senegalese forward goal khung pawh hi offside vangin pawmsak a ni lo. Mane hian Salah a thlak a, goal-a khung hmaa lakchhuah Salah a lawm lo. 

Mahse, Reds manager Jurgen Klopp chuan, "Ka lakchhuah avanga a hlim hunah buaina chu a awm chauh ang. Salah lungawi lo ka hrethiam a, mahse Covid-19 vanga tun hnaia a training tam tawk loh avangin fimkhur a ngai a ni," a ti. 

Minute 90-a liam tawh a, point thum nen Liverpool an haw ngei dawn niin a lang - mahse Andy Robertson-a'n box chhung aṭangin ball a pet chhuak a, ball chan tuma rawn tlawhtu Danny Welbeck-ke a pet tel avangin referee-in VAR a rawn. 

Mual sirah referee-in Robertson leh Welbeck-a ball inchuh a en nawn a, penalty pekna tur niin lang lo mah se inkhela thu ber referee-in penalty spot a kawk. 

Penalty pet turin kum 29 mi Pascal Gross-a lo pen chhuak a, chiang taka Alisson bum chungin goal-ah a chantir - hun a tawp zui a, Brighton-in champion lai lakah point khat hlu tak an hlawh chhuak. 

Damdawi in lun sa Liverpool tan chanchin lawmawm lo a awm belh a, tlarhnung leh midfield-a chhawr kawp theih James Milner chu hliam vangin lakchhuah a ngai. 

Inkhelh zawhah Jurgen Klopp-a lawm lo a, a lawm loh chhan ber erawh VAR vanga an beisei ang result an neih loh ai mahin an fixture tawt lutuk chu a ni ber. 

Klopp hian broadcaster ho chu fixture thlak danglam turin a lo ti tawh a, vawi tam a sawi ri tawh. Inkhelh zawhah BT Sport reporter-in Milner hliam chungchang a zawt a, "Ka lawmpui takzet che," tiin broadcaster ho duh anga thil thleng ang maiin a sawi!

German coach chuan, "Substitution panga siam theih tura tih tal hi a ngai a ni. Khelh dan tactic thlak emaw tih danglam tum pawh ni loin player-te him nan hrim hrim a ngai," a ti a, substitution panga neih a duh avanga amah sawiseltu Sheffield United boss Chris Wilder chu, "Mahni hmasial," tiin a sawisel bawk. 

Liverpool hi Champions League-ah Atalanta laka 2-0 a tlawm hlim an ni a, Klopp hian inkhelh 'ni' ngawr ngawr ai mah chuan a dar zat inhnaih lutuk chu a sawisel ber a ni a, Nilainia match neih hnua Inrinni zan hma lutuka inkhelh chu player tan a him loin a hria. 

Liverpool-in VAR vangin point hnih an chân tiin a sawi theih a, player-te pawh an lawm thei lo. Hetih rual hian Reds hi an khel ṭha tawk lo tih erawh pawm a ngai. 

Reds captain Jordan Hender-son chuan, "Ka duh ang tak ka sawi a rem lo a, chutianga ka sawi a nih chuan buaina ka hmachhawn mai ang! Offside kha chu line hmanga teh theih a ni a, mahse engtinnge penalty ve kha?

"Ṭan lam neiah min ngai mai thei a, Brighton player-te zawt ila, ka sawi ang tho hian an sawi ang," a ti a, penalty hlawh chhuaktu Danny Welbeck chuan inkhelh zawhah penalty an hlawhchhuahna chu a ho hlea (soft) a hriat thu a sawi. 

Klopp chuan offside chu a dik thu leh a 'tight' hreta a hriat thu a sawi a, German coach chuan penalty chungchang sawi zuiin, "A pakhatna kha chu a dik niin ka hria a, a pahnihna erawh referee thutlukna a ni. Referee ṭha tak chuan a hlawh chhuaktu player pawhin, 'penalty atan chuan a ho deuh a nih hi,' tia an sawi an hre ṭhin a, zaninah khan Brighton player-ten chutiang chuan an sawi," tiin referee a kâp.