Villa, Norwich leh Cherries dinhmun a derthawng

Premier League-ah Champions League khel tum boruak a san ang thoin inham tan tum boruak a sang. Nilaini zan khan tla thei dinhmuna ding club pathum Aston Villa, Bournemouth leh Norwich City te an inlan a, an chak zo lo vek. 

Norwich City-in an mual Carrow Road-ah Everton 1-0 in an hneh lo a, Bournemouth-in an mikhualna hmun Molineux Stadium-ah Wolverhampton Wanderers 1-0 thoin an hneh lo. Aston Villa erawhin minute 83-naa Ahmed Elmohamady goal hmangin an siphurh an sut hram a, St James Park-ah Newcastle United nen 1-1 in an inhnehtawk.

Premier League table mawngphahah Norwich City an awm mek a, match sarih khelh hma bakah an chung chiaha awm Aston Villa point sarihin an pha lo. Tunah erawh an harsatna belhchhahin a awm a, an mualah Everton lakah an tlawm. Toffees goal awmchhun hi minute 55-naah Michael Keane-a'n a khung a, Norwich hlauhthawnna belhchhahtu a ni.

Norwich manager Daniel Farke chuan, "A nihna tak thlir chuan Premier League khel zel emaw FA Cup champion emaw hi thil theih a ni lo. Chutihrualin kawr eng kan hak a, beiseina kan neih chhung chuan theihtawp kan chhuah zel ang," tiin a sawi. Canaries hian Inrinni zan dar 10:00-ah Manchester United nen FA Cup quarterfinal an khel ang.

Aston Villa-in point thum an mamawh tih hriain St James Park-ah an lenglut a, Newcastle dinhmun a la him bik loh avangin inkhel pawh a nung. Villa tan Trezequet tan chance ṭha a hlah a, Newcastle tan Joelinton-a'n hlah ve bawkin first half-ah goal a lut lo. 

Second half-ah Villa tlarhnung phui tawk lo chu Dwight Gayle-a'n remchangah lain minute 68-anaah Newcastle hmahruaina goal a khung. Villa an tlawm duh lo a, minute 83-naah Ahmed Elmohamady-a'n corner 

aṭanga ball kal a tauh lut. Goal dang a lut tawh lo a, 1-1 in an inhnehtawk.

Premier League khel zel turin point 40 chu a him tawka ngaih ṭhin a ni a, Newcastle-in point 39 an hmu tawh. Villa erawhin point 27 an hmu a, 19-naah an awm mek. A êng zawnga thlir chuan Villa hi an chunga awm pahnih Bournemouth leh West Ham nen an point hmuh zat a inang a, 16-naa awm Watford an phak lohna pawh point khat chauh a ni.

Wolves-in Champions League khelh tumin ṭan an la chho zel a, Raul Jimenez goal zarah Europe inelna sang bera inlan turin beiseina an nei sang chho zel. Minute 60-naah dinglam aṭanga Adama Traore cross chu Mexican forward Jimenez-a'n a tauh goal a, Wolves goal khung dan hi Inrinnia West Ham an hneh ṭuma an goal khung dan nen a inang hle.

Bournemouth-in goal zawnah a pet lo a, a chhanletna an neih miau loh avangin kum 2020 chhungin khualmualah point an la hmu lo. Cherries hian point 27 hmuin relegation zone-ah an awm a, 17-naa awm West Ham nen an point hmuh zat a inang. 

Bournemouth manager Eddie Howe chuan, "Match khat result hian kan hma lam hun a thlak danglam vek thei a, chuvangin kan rilru zawng zawng kan pe a, chak ngei pawh kan tum," tiin a sawi a, point an hmuh zawh loh avanga a rilru nat thu a sawi tel bawk.

Wolverhampton Wanderers erawh Man United nen an point 49 ve ve an hmu a, season bul ṭan ṭha lo mah se season tawp lamah an insiamṭhat avangin season thara UCL an khel a nih pawhin thil mak a ni tawh lo.