Edmund lakah Murray a chak lo

Nilaini zan khan British exhibition an khel chhunzawm leh a, taksa hrisel leh fit zawk Kyle Edmund chuan hliam dam hlim Andy Murray hnehin semifinal a inhlangkai.

Nikum November thla hnua a match hnih nan Murray a inlan, world number 1 hlui hi a hnampui Edmund lakah hian 6-7 (2-7), 7-6 (7-5), 10-5 in a chak lo. Chak lo mah se a la tla nghal lo, a match lehpekah James Ward a hneh chuan semifinal a la lut thei.

Inelna hi Murray-a unaupa Jamie-a'n National Tennis Centre, Roehampton-a a buatsaih a ni a, ni ruk chhung khelh tur a ni. A hmuna entu awm lo mah se TV leh online aṭangin sum an hmu a, mi harsate tan an sem chhuak leh ang.

Grand Slam vawi thum champion tawh Murray hi hliam vangin a inkhel mumal lo rei ta hle a, world ranking lamah pawh 129-naah a tlahniam tawh. Tun hnaiah a hliam dam leh tawhin kumin chhungin US Open leh French Open khelh theih a inbeisei.