Bangalore-ah Aizawl FC chak lo

Nimin tlaiah Aizawl FC-in Bangalore-ah goal an khung thei lo a, Bengaluru FC-in injury time-ah substitute Marjan Jugovic hmanga goal an khung si avangin Sree Kanteerava Stadium-ah Mizo club an chak lo.

Nizana Kolkata Derby result kan hre hman lo a, point 30 hmu tawh Aizawl FC hi an hnuaia awm Kolkata club lian pahnih East Bengal (27 pts) leh Mohun Bagan (26 pts) ten an hnaih tawh hle.

A ngai tho?
Aizawl FC coach Khalid Jamil-a'n player chhawr rimte bawk a hmang nawn a, an match hnuhnung bera Minerva Punjab an khelh ṭuma hrem vanga khel thei lo Eze Kingsley chiah chu starting eleven-a danglam a ni.

RG Stadium-a club pahnih intawn ṭum nen pawh pakhat chiah a thlak a, Lalruatthara aiah R. Laldanmawia a lut. Hmunhmelṭha tlangval Ruatthara hi East Bengal (Feb 20) nen a inhliam hnuah squad-ah a awm leh thei tawh.

Bengaluru coach Albert Roca-a'n Aizawl-a a chhawr theih loh John Johnson leh Juanan chu defence laiah a hmang thei tawh a, Mizo tlangval Sena Ralte aiah Nishu Kumar a luhtir bawk.

Vannei vanduai
Bengaluru FC-in bul an ṭan ṭha a, minute ngana lekah Sunil Chhetri ball tauhin AFC defender Ashutosh Mehta a per hnuah goal ban a per. Minute 22-naah Daniel Lalhlimpuia'n captain Chhetri hnen aṭanga a ball hmuh chu nalh taka insiamremin ṭha takin a pet a, AFC keeper Albino Gomes-a'n a dan sak.

Champion lai Bengaluru player pawimawh Udanta Singh chu inhliam vangin minute 24-naah lakchhuah a ni a, Aizawl FC-in tan chanchin ṭha a ni.

Mizo club-in first half hun chanve hnu lam an thunun a, R. Laldanmawia'n Blues keeper Amrinder Singh chauh hmachhawn hmanin lang mah se offside hmangin mualneitu a him.

Minute 45-naah AFC right back Ashutosh Mehta-a'n hla tak aṭangin kawh zetin a pet a, goal ban a per. Hemi aṭanga ball kal zel chu Jayesh Rane-a'n a ke ding lamin box pawn aṭangin nalh takin a pet a, keeper Amrinder-a'n pha lo mah se goal pawnah chiah a kal.

A goal tlai
Second half-ah Aizawl FC an che ṭha zawk mah a, mualneitu aiin an goal nawr a na zawk. Captain Alfred Kemah Jaryan-a'n ṭum hnih goal khung theihna hun ṭha a neih chu a hmang ṭangkai lo a, chance ṭha dang a tam lo.

Hun tawpah Bengaluru an vannei a, injury minute thumnaa captain Chhetri-a freekick pet chu Serbian forward minute 60-naa lut Marjan Jugovic-a'n a tauh lut - a vengtu tur Kamo-a'n hna a thawk lo - Aizawl FC tan thawh ngaihna a awm tawh lo.

A harsa dawn
Aizawl FC-in April 15 khian Churchill Brothers a lenchilh dawn a, April 22-ah Mohun Bagan an mikhual zui ang. North East Derby khelh hun tur la hriat loh mah se point hmuh harsatna hmun Shillong Lajong khelmualah an khel dawn.