MFA Futsal Committee Thuchhuah

Mizoram Football Association Futsal Committee thukhawm chuan All India Football Federation rawtna, India ram state tina changtlung zawka futsal kalpui tur chu bawhzuiin Mizorama futsal kalpui dan tur hetiang hian a rel:

1. Futsal Inbuatsaihna: All India Football Federation aṭangin Futsal lam mi thiam, Asian Football Confederation hnuaia Futsal technical lam thiam chuan April, 2017 chhung hian MFA a rawn tlawh dawn. Ani hian Mizorama Futsal kalpui tura Match Commissioner, Match Officials leh Organisers te training a pe ang a, FIFA-AFC-AIFF duh dan angin Futsal chu awmze neia a dan dik taka kalpui turin MFA chu bul a ṭanpui dawn a ni. AIFF chuan kum 2017 chhung hian India ram pum huap Futsal inelna a buatsaih tur chu MFA an rawn hriattir tawh bawk a ni.

2. Player registration: MFA, District FA leh Zone FA hnuaia registered player-te chu 2016-2017 season chhungin a hranpain Futsal atan registration tih nawn a ṭul hrih dawn lo a, registration awm sa chu rin a ni ang. Hetihlai hian MFA, District FA leh Zone FA hnuaia registered player-te chu AIFF thuchhuah angin MFA hriatpui loh Futsal inelnaah tel phalsak an ni lo ang.

3. Tournament Recognition: Mizoram chhunga Futsal tournament buatsaih duhte chuan MFA aṭangin phalna an la hmasa tur a ni a, MFA Technical Rules-a inziak angin 'tournament recognition fee' Rs 1,000 chu MFA Futsal Committee hnenah an pek a ngai a; heng tournament-ahte hian MFA, District FA leh Zone FA hnuaia registered player-te khelh phasak an ni ang. MFA registered player ni lo (free man), MFA hriatpui Futsal inelnaa tel duh an awm chuan MFA-in a phalsak dawn a; nimahsela MFA hriatpui ni lo inelna dangah an tel thei lo ang a, MFA recognised tournament-ah chiah an khel thei ang. Tournament recognition hi May, 2017 aṭanga hman ṭan tur a ni a, MFA-in Futsal a kalpui ṭan hma April, 2017 thlenga Futsal inelna buatsaih tawhte chu he dan hian a huam lo ang.

4. MFA Futsal Cup 2017: Kum 2016-2017 season kal mekah hian MFA chuan Futsal competition, 'MFA Futsal Cup' a buatsaih dawn a, May 4, 2017-ah Aizawlah he inelna hi bul ṭan a ni ang. He inelnaah hian MFA hnuaia registered player-te an tel thei dawn a, an duh angin team an siam thei ang a, lawmman ṭha tawk tak siam a ni ang. A chunga tarlan tawh angin MFA registered player ni lo (free man) pawh MFA Futsal Cup-ah hian tel phalsak an ni ang a; amaherawhchu MFA hriatpui loh inelna dangah erawh an tel phal a ni lo ang.

MFA Futsal Cup 2017-ah hian eng team pawh tel theih a ni a, April 11-28, 2017 chhungin MFA Office, City Park-ah entry fee Rs 500/- pek theih a ni.

5. Club Affiliation: MFA season thar, June, 2017 aṭangin Futsal Club affiliation hi mumal taka kalpui tur a ni dawn a, FIFA-AFC-AIFF dan angin Mizoramah mumal zawka Futsal kalpui tur a ni ang a, inelna pawh buatsaih chhoh zel a ni ang.

6. India ramah Futsal: AIFF chuan kum 2017 chhungin India ramah national level Futsal competition a buatsaih dawn a, India ram state hrang hrangah Futsal chu awmze nei zawka FIFA-AFC-AIFF hriatpuina chauha khelh a nih theihna turin hma lak zel a tum.

- Information & Publicity Committee, Mizoram Football Association