Chelsea leh Spurs an inûm zel

Tottenham Hotspur-in Inrinni zanah Watford 4-0 in an hneh a, Premier League hmahruatu Chelsea nena an inthlauhna chu point li chauh a ni hman. Amaherawhchu Antonio Conte hote Spurs pressure pek vangin an buai lo, Dean Court-ah Bournemouth 3-1 a hnehin match sarih khelh hma bakah point sarihin hma an hruai a, Blues hi champion tura rinkai ber an ni.

Spurs an ṭha

White Hart Lane-ah Watford-in bul ṭan ṭha mah se Tottenham-in Dele Alli an nei. English midfielder hian minute 33-naah box pawn aṭangin kual nalh takin a pet a, goal kilah tak a lut. Hemi hnu hi chuan mualneitu Spurs an chungnung.

Eric Dier-a'n minute ruk hnuah Spurs goal hnihna a khung a, goal hmasa pahniha inrawlh Son Heung-min-a'n minute 44-naah ama pualin Christian Eriksen pass chu goal ropui khung nan a hmang. South Korea forward Son hian minute 54-naah Spurs goal lina a khung bawk.

Son hian hattrick siam theihna hun ṭha ṭum hnih a bawhpelh a, inhliam Harry Kane pawh minute 61-naah a rawn kir a, English striker hian hun tawp hmain freekick aṭangin crossbar a pet per ve bawk.

Tottenham manager Mauricio Pochettino chuan, "Kan khelh danah khan lawmna tur a tam hlein ka hria. Result lawmawm tak a ni a, nomawi beisei chungin theihtawp kan chhuah zel ang," tiin vanneih a la inbeisei hle.

Dinhmun ṭha

Tottenham hian nomawi an chawi pha ta lo a nih pawhin tun dinhmuna Liverpool, Manchester City, Arsenal leh Manchester United te lungawi tawkna Champions League khelh an thlen phak dawn avangin Pochettino hote dinhmun hi club dang awh a ni.

Season liam ta khan Spurs hian an hmelma Arsenal chunga awm theihna hun ṭha an nei a, an hmang ṭangkai lo. Tun season-ah anmahni aia match hniha khel tlem Gunners aiin Spurs hian point 14 in an hmu tam a, Arsenal chunga an awm hnuhnun ber chu kum 1995 daih tawh kha a ni a, season tawpa lawmna tur an ngah hle.

Blues an tlo

Bournemouth defender Adam Smith-a'n an lama a tihluh hmangin Chelsea-in minute 17-na lekah hma an hruai nghal a, minute thum hnuah Eden Hazard-a'n goal hnihna a khung bawk.

Cherries forward Joshua King-a ball pet chu minute 42-naah Blues defender dan per zarah mawi takin a lut a, amaherawhchu mual­neitu point hmuh beiseina hi Chelsea defender Marcos Alonso-a'n minute 68-naah freekick dak ṭha tak hmangin a tihtawp sak.

Chelsea boss Antonio Conte chuan, "Pressure neih belh hi chu kan tih ṭhan a ni a, kha mi vang khan fimkhur phah sawt a ni," tiin Spurs pressure pek chu an ṭhatpui thu a sawi.

Kawng harsa

Chelsea-in April 16, Pathianni zanah Old Trafford an tlawh dawn a, Conte naute tan champion kalkawng a la awlsam lo. Chutihrualin Blues hian tun season-a vawi hnih an hneh tawh Jose Mourinho hote hi an hneh leh a nih chuan Spurs nomawi beiseina chu a tawp titih tawh ang.

Tottenham tana chanchin ṭha erawh Blues forward Diego Costa-a'n league match vawi ngaah goal a khung tawh lo a, Spain international striker a chet chhiat chhunzawm chuan Chelsea hi point hloh thei reng an ni. Conte erawhin, "Goal hmasa ber luh theih chhan kha Diego Costa vang a ni a, game ṭha takin a khel a, team tan a thawkrim bawk," tiin ngaih ṭhat lohna tur a awm loh thu a sawi.