Inpumkhat hun a ni - Wenger

Arsenal manager Arsene Wenger-a’n an hun tawn harsa tak aṭanga tal chhuak tur chuan inpumkhat taka an awm a pawimawh thu a sawi.

Zanin dar 12:30 hian Arsenal hi Crystal Palace khelmual Selhurst Park-ah an lenglut dawn. Season thara Champions League khelh tuma Gunners elpui ten kartawp Premier League inkhelah hnehna an chan tawh avangin Wenger-a naute tan point hloh a thiang lo.

Gunners manager Wenger chuan, “Hun harsa kan paltlang chho mek, tun season-ah hian hmabak kan la ngah hle a, inpumkhatna nen huaisen takin kan hmachhawn tlang tur a ni ang,” tiin a sawi.

Arsenal hian an league match hnuhnung paliah vawi khat chiah hnehna an chang a, point 54 nei tawhin palina Manchester City chu point sarih zetin an phak lo - City hian match hnihin an khel tam zawk, nizan inkhel result a zirin an inthlauhna hi a danglam thei bawk.

Arsenal hian an match hnuhnung berah West Ham 3-0 in an hneh a, result ṭha neih chhunzawm nan chuan Crystal Palace hi team thlanawm tak an ni thei ang. Wenger-a naute hian inelna hrang hranga Palace an hmachhawn vawi 33-ah ṭum hnih chiah chak loh an nei a, league match bikah chuan vawii 11 an inkhelh tawhah chak loh an nei lo.