Champion thei zingah TKS
Mizoram Super League Season 3-ah club lian leh club te an inthliar chho zel a, Tuikual South-in champion thei zinga mi an ni tih nemnghet turin Zirtawpni zan khan Chanmari Hollow 87-80 in an hneh.
Hawla Indoor Stadium-ah inkhel entu an kal ṭhahnem a, Tuikual South-in state pawn player ṭha pahnih Amjyot Singh Gill leh Palpreet Singh Brar te an neih an ṭhatpui a, Hollow laka hnehna chang turin harsatna an tawk lo.
Amjyot a thiam
Tuikual South bigman Amjyot hian '180 degree dunk' a rawn chhawp a, entu mit a tlai hle. Feet ruk leh inches riata sang Amjyot hi a len avangin rebound lak kawngah Hollow player pakhatmahin an ngam lo a, a shooting a ṭha tel - India tana khel pha player hian point 22 nei turin vawi thum 3-point a lut a, hei hian a theihna san zia a pholang.
Amjyot hahdam hun chhunga chhawr turin TKS coach KC Lalliantluanga'n Palpreet (15 pts) a nei leh zel a, hnehna an chan theih nan Mizo player Lalrohlua (14 pts), F. Zodinthara (9 pts) leh Lalfakzuala (9 pts) te an ṭangkai tel bawk.
Hollow innghahna Jagdeep Singh ven kawngah Tuikual South-in harsatna an nei a, Amjyot leh Palpreet ten a vanglaia an player ngaihsan Jagdeep an theihna zawng zawngin an veng lo tih a hmuh theih.
Danglamna Freethrow
Hollow-in Tuikual South elpha lo deuh mah se vanneih zanah chuan chak thei tur an ni.
Mohit Badhu-a'n (2 pts) point 30 nei thei Jagdeep a thlawp pha lo. Punjabi player Jagdeep pawh a kut a kal tawk lo a, 3-points lut turin vawi tam tum mah se vawi khat chiah a lut.
MSL kaithar tan R. Lalnunpuia (16 pts), Vanlalṭhazuala (15 pts) leh Lalhmachhuana (15 pts) te khel ṭha viau mah se freethrow luh an harsat. Hollow-in Tuikual South lakah freethrow vawi 16 an hlah a, Mizo bakah Jagdeep Singh pawh a bang lo - result ṭha zawk an duh chuan insiam ṭhat a ṭul dawn.
Hollow chak zo lo mah se Mission Veng Vikings an hneh tawh avang leh chak la nei lo Zarkawt Serpents an hmachhawn dawn avangin semifinal kawng a inhawng zau hle.
Tuikual South Chanmari
26 1ST 18
22 2ND 23
48 HT 41
18 3RD 15
21 4TH 24
87 TOT 80