Champions League khelh tum boruak a sang ; Liverpool 'comeback' zanah City tlawm bik lo
Premier League club zingah season thara Champions League khel tur rinthiam a harsa tawlh tawlh - Inrinni zan khan Liverpool chu Stoke City lakah comeback-in 2-1 in hnehna an chang a, tlak hlau Hull City lakah Manchester City chuan 3-1 in Champions League khelh an tumzia an lantir thung.
Liverpool tan damsam lo chunga khelhtir Philippe Coutinho chu damna a ni a, Brazilian midfielder luh hnuah Reds hian goal hnih an khung. City khelmualah Hull midfielder Ahmed Elmohamady-a'n mualneitu team goal khat a 'khilai' a, Sergio Aguero leh Fabian Delph ten goal khat ve ve an khung bawk.
B for Liverpool
Liverpool manager Jurgen Klopp-a'n Bournemouth an draw ṭuma dam loh vanga lakchhuah ngai Coutinho leh Roberto Firmino te bench-ah a dah a, Brazilian midfielder pahnih aia a luhtir chu kum 17-a upa Ben Woodburn leh kum 18-a upa Trent Alexander-Arnold te a ni.
Klopp-a'n thutlukna a siam fuh lo tih Stoke khelmualah a lang chhuak har lo. Minute 44-na lekah ven loha awm Jon Walters chuan Xherdan Shaqiri ball cross chu ṭha zetin a tauh lut a, Simon Mignolet-a tan tih theih a awm lo. German coach-in second half ṭantirah Coutinho leh Firmino a luhtir a, Reds inkhel a nung sawt.
Dejan Lovren-a'n bar a tauh per hnu lawkah Coutinho a inlar a, 'The Little Magician' tia hming lem an pek hian minute 70-naah ṭha zetin si phurh sutna goal a khung. Minute hnih hnu lawkah Georginio Wijnaldum ball pek tawih zet chu Firmino-a'n chakna goal ni turin a khung zui - Reds chaknaah Mignolet lam hmaih a thiang lo, Belgian keeper hian save ṭha tak a neih nual karah Saido Berhaino pet goal ngei tur nia lang a dan chu sawi hmaih phal chi a ni lo.
Klopp thukhawchang
Liverpool boss Klopp chuan, "Coutinho hi ni thum chhung lekin a rihna kg thumin a tla hniam a, mi ṭhenkhat tan chuan chu chu chanchinṭha a ni mai thei a, professional footballer tan erawh thil hriat nuam a ni lo. Firmino hi tun hnaiah a zin chau bawk si a, second half-a anni pahnih luhtir kha thil awlsam a ni lo," a ti.
Klopp chuan a keeper fak nghalin, "Simon Mignolet khan min chhanhim a ni. Kan hna ṭha takin kan thawk a, tunah chuan point 63 kan neih tak avangin ka hlim hle. Hmasawn zel tur chuan zanina kan game angah kha chuan hnehna kan chan zel a ngai a ni," tiin a sawi.
City an tho ta
Premier League match li chhung hnehna an chan zawh loh hnuah Manchester City-in chak hmel an hmu ve leh ta a, an mikhual Hull City lakah ṭhat an chhuah duh lo. City-in mualneitu an ni tih pholangin inkhel ṭantir aṭangin an nawr nghal a, minute 31-naah Jesus Navas ball cross chu Elmohamady chuan an lamah a ti lut.
David Silva-a'n City tana a match 300-na a khelh zanah City an hmuhnawm a, minute 48-naah Sergio Aguero hmangin an goal hnihna an khung. Fabian Delph hun a thleng a, ven loha awm English midfielder hian box pawn aṭangin goal thumna a khung - Aston Villa captain hlui hian 92% zet pass dik a nei!
Pep Guardiola naute tan Silva, Leroy Sane, Yaya Toure leh Delph ten hun ṭha dang nei vek mah se goal-ah an chantir thei lo a, Hull tan Andrea Ranocchia-a'n goal khat a sut laiin Oumar Niasse-a'n goal khat an chhuah hnu lawka a hun ṭha neih a chhawr thei lo chu an ui ve khawp ang.
A chiang lo
City manager Guardiola chuan, "Ni engemaw zat chak hmel kan hmuh loh hnua hnehna kan chang ve leh ta hi a lawmawm a, inkhel bul kan ṭan ṭhain chak duhna thinlung kan pu a ni. Goal tam zawk erawh khung thei kan ni a, a pawi ber erawh goal kan chhuah kha a ni. Set piece-ah ka nauten inzirna tur an la nei," a ti.
Pep chuan Champions League khel tur a la chian mai loh tur thu sawi nghalin, "Premier League match tawpniah Champions League khel tur chu a chiang chauh ang," a ti a, chona hautak hmachhawn turin a inpeih.
Inkhel Results
Tottenham Hotspur 4 - 0 Watford
Manchester City 3 -1 Hull City
Middlesbrough 0 - 0 Burnley
Stoke City 1 - 2 Liverpool
West Brom 0 - 1 Southampton
West Ham United 1 - 0 Swansea City
Bournemouth 1 - 3 Chelsea