Madrid derby-ah chak zawk an awm lo
Inrinni zan khan Madrid Derby-ah Real Madrid leh Atletico Madrid an inhmachhawn a, chak zawk awm loin 1-1 in an ṭin. Santiago Bernabeu-a inkhel boruak sangah Real tan defender Pepe chuan goal hmahruai khung mah se Atletico hian Antoine Griezmann hmangin an si phurh an sut.
La Liga hmahruaitu Real chak zawh loh zanah Barcelona-in Zinedine Zidane-a naute umphakna remchang nei mah se an chhawr ṭangkai thei lo a, an mikhualna ramah Malaga chu 2-0 in an ngam lo - he inkhelah hian Neymar chu hnawhchhuah a ni.
Madrid Derby chu
Santiago Bernabeu-a Madrid derby match hnuhnung pathumah Atletico Madrid-in hnehna an chang vek a, Inrinni zanah Real-in thlen nawntir an duh lo - inkhel ṭantir aṭang-
in Atletico an nawr nghal. Mahse, Zidane-a nauten beisei ang ngawtin goal erawh an khung lo.
Minute 52-naah tlarhma nei ṭha Real tan defender Pepe a inlar a, Portugal international hian Toni Kroos free kick aṭanga ball kal chu an hmahruaina goal ni turin a khung. Real-in inkhel thunun chhunzawm mah se Atletico keeper Jan Oblak tan buapui tham hna erawh an siamsak chhunzawm thei lo a, goal khungtu chu Atletico an ni.
Minute 85-naah Griezmann a inlar a, French forward thiam zia Real player-ten hnai takah an en! Tunlai player zinga 'hot' ber pawl hian Angel Correa through ball chu ṭha zeta um lutin a pet goal a, a tihdan pangngaia lam chungin a goal a lawm - boruak sangah pawh he forward hi a buai lo.
Chak phu Madrid
Inkhel pumpui thlirin chak phu zawk thlan tur nise Real Madrid thlan an ni ngei ang. Zinedine Zidane-a naute tan first half-ah Karim Benzema chuan hun ṭha a nei a, mah se French striker goal shot ṭha zet hi Atletico goalkeeper Oblak fakna mai a ni.
Madrid derby hnuhnung bera hattrick siamtu Cristiano Ronaldo-a'n hun ṭha nei bawk mah se Portuguese forward pet goal ngei tur nia lang chu defender Stefan Savic-a'n goal line aṭangin a lo pet chhuak hman. Atletico tan Fernando Torres chuan hun ṭha a nei bawk a,
ṭha zeta Sergio Ramos tlanpela keeper Keylor Navas chiah a hmachhawn hnuah a pet goal thei lo.
Real Madrid-in Santiago Bernabeu-a Madrid derby hnuhnung paliah chak hmel an hmu zo ta lo a, an khelmuala Madrid derby-a chak hmel an hmuh loh rei ber ṭum a ni. Real-in chanchin lawmawm loh dang an neih chhunzawm a, goal khungtu Pepe chu hliam vanga lakchhuah a nih avangin April 12 zana Champions League quarterfinal-a Bayern Munich an hmachhawn hunah a inlan thei lo ang.
Zidane a chiang lo?
Real Madrid coach Zinedine Zidane-a'n Madrid derby-ah a naute hnehna a chanpui zo lo a, a dinhmun a derthawng nghal! French manager chuan, "Kan hmalam hun hi ka kuta innghat a ni lo a, in hre duh ṭalh a nih chuan midang in zawt thei ang," tiin a hmalam hun zawttu journalist-te a chhang.
Zidane chuan sawi chhunzawmin, "Nitinin ka nun zawng zawng he club tan hian ka hlan a, he club kawr ha tura mamawh phurna nen he club hi ka kaihruai ṭhin. Zaninah khan game ṭha tak kan khel a, mah se minute nga chhung lek kan rilru kan pek tawk loh avangin kan tuar a ni," tiin a sawi.
Barca an chuai
Barcelona-in Real Madrid chak zawh loh zanah hun ṭha nei mah se team tenau zawk Malaga an ngam lo. Mualneitu Malaga tan Barca forward hlui Sandro Ramirez chuan goal hmahruai a khung a, tun nipui transfer-a amah chhuah zalentu club lakah zahngaihna a lantir lo - kum 21-a upa forward hian Malaga tan tun season-ah match 23 khelin goal 10 a khung tling ta.
Catalan club-in hnehna chang tura goal khung ngei an mamawh laiin an mamawh loh zawk an hmu a, Brazilian forward Neymar chu minute 65-naah hnawhchhuah a ni - Brazil captain hian defender Diego Llorente chu ball awm loh hnuah a tih tluk avangin a yellow card pahnihna a hmu a ni.
Barca-in Malaga keeper Carlos Kameni an chhaih buai hman meuh lo a, an hun ṭha neih chhunah Luis Suarez goal khung tur nia lang chu Cameroon international hian vawi hnih ngawt ṭha takin a dan sak. Barca-in player kim loa an khelh an tuar chhunzawm a, Jony Rodríguez chuan minute 90-naah chak nemnghehna goal a khung.
Hrem tur Neymar?
Neymar-a'n red card a hmuh avangin an league match hmasa bera Real Sociedad an hmachhawn hunah a inlan thei dawn lo chiang a, hei aia sawi hlawh zawk erawh card a chawi hnua a khawsazia a ni. Brazil captain hian card a chawi hnuah ngeiawm takin a kut a beng a, a khawsazia hi official runluihna anga ngaih a nih chuan rei zawk hrem theih a ni - Sociedad zawhah El Clasico an khelh dawn avangin Barca hotute mut a tui lo tawp ang!
Barca boss Luis Enrique chuan a nau hi chhan tlatin, "Game ṭhenkhatah chuan fimkhur taka kan khelh hi a ngai a ni. Kan khingpuiten an phu ang yellow card an hmuh loh laiin dim taka ball chhuhsak kan tumna lamah pawh card kan chawi leh si ṭhin. Referee ten min dim lo bik ṭhin hi a chhan hriat a chakawm a, mah se kan tawn ṭhan a nih avangin kan hrethiam viau zel tawh," tiin a ṭawng ngeiawm thiam hle.