Kings XI Punjab an lal len

Inrinni zan Indian Premier League inkhelah Kings XI Punjab-in sum seng hnem Rising Pune Supergiants lakah an chungnung zawk tih an pholang a, wicket rukin hnehna an chang.

Indore khawpuia inkhelah Pune an bat hmasa zawk a, over 20-a an run siam zat chu 163 niin wicket ruk an hloh. IPL neih meka hlawh hnem ber Ben Stokes chu Pune tana run siam hnem ber niin half century a siam a, run 40 siama a tawp thleng dam Manoj Tiwary chuan a thlawp ṭha viau bawk.

Kings XI-in an target an umna kawngah opener Hashim Amla (28 runs) out hma mah se captain Glenn Maxwell (44 runs) leh David Miller (30 runs)-ten a tawp thleng damin an ding khawng tlat a, over 19-ah run 164 siama wicket li hlohin an team hnehna an chanpui.

Inrinni zan inkhel dangah Royal Challen­gers Bangalore chuan mualneitu an ni tih an pholang a, an mikhual Delhi Daredevils lakah run 15-in hnehna an chang. RCB hian over 20-ah run 157 siamin wicket riat an hloh a, ball 37-a run 69 siamtu Kedar Jadhav chu run siam hnem ber a ni.

RCB batting-in beisei phak lo mah se Delhi lamin an chhawr thei lo. Rishabh Pant (57 runs)-in thlawptu a neih ṭhat tawk loh avangin over 20-ah run 142 chiah siamin wicket kua an hloh a, an tlawm.

Zirtawpni zan khan Kolkata Knight Riders chuan wicket 10-in an mikhualna ramah Gujarat Lions an sawp bawk. Gujarat tan captain Suresh Raina-a'n run 68 siamin over 20-ah run 183 an tlin a, wicket li chiah an hloh.

Gujarat dinhmun a him viau niin a lang a, mah se KKR opener Gautam Gambhir (76 runs) leh Chris Lynn (93 runs) ten an thiam thil 'show' a a tawp thleng an dam avangin Kolkata an chak chiang hle. KKR hian over 14.4-ah an batsman pahnih hmang hian an target an umpha der!

Zanin dar 8:00-ah inkhel pakhat a awm dawn a, Kings XI Punjab chuan Royal Challengers Bangalore a mikhual ang.