New York leh Berlin marathon an ṭhulh

Coronavirus chuan infiamna khawvel a nghawng buai mek zel a, intlansiak mite ngaihhlut tak New York City leh Berlin marathon te chu kuminah hripui leng vang hian neih theih a ni dawn lo.

New York khawpuiah hian November 1 hian a huhoa intlansiakna lian tak hi neih tum a ni, a vawi 50-na a nih chiah dawn avangin ropui taka neih an tum. Mahse nikuma mi 53,640 telna hi kumin atan chuan ṭhulh fel a ni.

German rama khawpui pakhat Berlin-ah pawh September 27 hian neih tum ni mah se an ṭhulh. Hlimna, lawmna, hriselna leh hlawhtlinna awmna hmun tia an sawi ṭhinah hian kumin chu hun hlimawm hman theih a ni dawn lo.

New York Road Runners president leh CEO ni bawk Michael Capiraso chuan, "New York City Marathon ṭhulh a ngai hi he infiamnaa inhnamhnawih zawng zawngte tan chuan chanchin hriat nuam lo tak a ni. Mahse mipui hriselna dinhmun kan ngaihtuah vangin a ngai ta si," a ti.