Hazard inhliam zanah Real an tlawm

Real Madrid-in an mikhual Alaves lakah goal hnih an chhuah a, goal khat chauh an khung let theih avangin La Liga club tenau lakah 2-1 in an tlawm. 

Alaves tan Lucas Perez penalty leh Victor Laguardia-ten goal khat ve ve an khung a, Real tana Casemiro goal khungin awmzia a nei phak lo. 

Real Madrid-in hnehna an chan loh bakah chanchin lawmawm lo hriat tur an nei a, Eden Hazard chu hliam vangin lakchhuah a ngai. 

Inrinni zan La Liga inkhel langsar dangah Atletico Madrid chuan 1-0 in Valencia an hneh a, goal awmchhun hi Valencia left back Toni Lato-a'n an lama a tih luh a ni. 

Real Madrid khelmuala inkhel an ni a, Spanish club lian hi chak tura rinkai zawk an ni - mahse minute ngana lekah Zinedine Zidane-a naute hian goal an chhuah. 

Alaves centre back Víctor Laguardia-a ball tauh chuan hliam vanga inlan thei lo Sergio Ramos aia luhtir Real defender Nacho-a kut a per a, penalty area a nih avangin referee-in penalty spot a kawk. 

Kum 32 mi Lucas Perez a lo pen chhuak a, Arsenal striker hlui hian Premier League-ah hlawhtling tawk lo mah se La Liga-ah chuan striker dang daih a ni tih pholangin  Thibaut Courtois goal venah a chhuih lut. 

West Ham tan pawha lo khel tawh Perez hian season hmasa khan league match 33-ah goal 11-a khung a, tun season-ah match kua khela goal thum khungin assist vawi hnih a nei tawh. 

Real Madrid-in an inrin loh karin goal an chhuah a, mahse Zidane-a naute an insiamṭha lo - minute 49-naah an goal hnihna an chhuah a, Real B team striker hlui Joselu-a khung a ni. 

Belgian keeper Thibaut Courtois a chesual a, a ball petchhuah tum chu Joselu hian lo chang fuhin goal-ah a chantir a, minute 49-a nih meuh chuan 2-0 in Alaves-in hma an hruai der!

Real-in an beisei angin si phurh sutna goal an hlawh chhuak lawk thei lo a, hliam vanga chhawr theih loh Karim Benzema awm loh a hriat. Hun tawp nan minute li chiah a awm tawh tihah an khung ve hram a, bench aṭanga luhtir Vinícius Júnior-a shot per lehlam chu Casemiro chuan hnai set sawt aṭangin a khung. 

Mahse, Real harh a tlai a, si phurh sut zo turin hunin a daih tawh lo - Isco chuan hun pek belh minute nganaah bar a tih per a, hun a tawp zui. Rin hlawh lo zawk Alaves 2-1 in an chak. 

Minute 28-na lekah Hazard chu hliam vanga lakchhuah a ngai a, he thu buatsaih a nih thleng hian a chawlh chen tur puan ni lo mah se Zidane chuan a ngaihtuahawm a rin loh thu a sawi. 

French coach chuan, "Hliam tenau ni turah ka ngai a, Hazard pawhin chu chu min hrilh dan a ni," tiin a sawi a, a player inhliam chu a ngaihtuahawm a ring lo. 

Kum 2019-a Chelsea aṭanga Real a zawm hnuah Hazard-a'n beisei a phak lo - hliam vangin a buai reng a, Spanish club-a pan hnuah match 27 chiah a la khel!

Tun season-ah hliam vangin bul a ṭan thei lo a, a dam hnuah match thum a khel hman chauh tihin Covid-19 a kai avangin November thlatirah a chawl zui - Villarreal leh Inter Milan (Champions League) theiin a dam a, Alaves lakah a inhliam zui leh ta. 

Real-in result an nei ṭha hleithei lo a, nizan lama Osasuna mikhualtu Barcelona result erawh kan hre hman lo thung - thil chiang tak erawh tun season La Liga-ah Real leh Barca an talbuai takzet. 

Spanish club lian pahnih an talbuai laiin anmahni el phak bertu Atletico Madrid erawh an chak chhunzawm zel a, league match ruk chhung a zawna an chakna ni turin Valencia chu 1-0 in an hneh. 

Hriat tel tur chu Atletico-in an hneh tawh zingah Barcelona an tel a, team ṭha Valencia an hneh leh tak avangin season chawhma lam la ni mah se Madrid khaw club hian champion an mitthla ṭan ang. 

Atletico-in hliam vangin Luis Suarez an chhawr thei lo a, João Félix-a'n bench lamah hun a hmang hmasa bawk - mahse hetichung hian Atletico an chak tho a, substitute Yannick Carrasco-a shot chu Toni Lato chuan lo dang perin an lamah a ti lut a ni.