Kolkata Derby-ah Bagan an chak
I League champion inchuh boruak nung chho takah Mohun Bagan-in Pathianni zan khan East Bengal 2-1 in an hneh a, hmahruai mektu Aizawl FC-in champion lai Bengaluru FC an hneh loh avangin Jeje Lelpekhlua khelhna club Mariners chu nomawi chawi turin an dinhmun a ṭha hle.
Bagan hian match khata khel tlem chungin point 29 an hmu a, Aizawl FC an phak lohna chu point khat chauh a ni. Champion thei zinga mi East Bengal erawh an hmelma Kolkata Derby-a point an hmuh loh avangin point 27-ah an la tang a, AFC leh Mariners chetsual an chan a ṭul tawh ang.
Phur leh buai
Kolkata Derby hrim hrimin ngaihven a hlawh a, tun ṭumah phei chuan champion nghawng thei inkhel a nih avangin derby boruak a lian zual. Salt Lake Stadium-in FIFA Under 17 World Cup a thlen dawn avangin Kanchenjunga Stadium, Siliguri-ah I League inkhelh pawimawh hi khelh a ni a, Mohun Bagan home fixtures a nih avangin stadium khat tlata mipui pungkhawmah Mariners ṭantu an tam zawk.
East Bengal tan Robert Lalthlamuana'n captain armband a hreng a, Lalrindika Ralte leh Mariners forward Jeje ten inkhel bul an ṭan lo. Mohun Bagan-in international break zawhah champion lai Bengaluru 3-0 a an sawp tawh avangin derby hmachhawn turin an inpeih zawk. Red and Gold erawh match hnuhnung pahniha Chennai City leh Churchill Brothers hneh loh vanga hmahruaina dinhmun hloh an ni.
Goal ropui
Mohun Bagan-in inkhel an thunun a, minute 36-naah Sony Norde-a'n freekick aṭangin mawi takin a a khung. Mariners ṭantute phurna belhchhah turin Azharuddin Mallick-a'n halway line pelh hret aṭanga ball lalutin box pawn aṭangin a pet thut a, goal kilah lutin keeper Rehenesh dem theih a ni lo.
East Bengal harsatna belhchhah turin goal sarih khung tawh Willis Plaza chu Bagan defender Anas Etathodika a nam avangin hnawhchhuah a ni a, injury time-a Rowllin Borges a pet goal chu mualpho hliah khuhna mai niin a pawi tur ang chu a thleng vek tawh.
Bagan Under 22 player Azharuddin Mallick chuan, "Ka goal hi ka pa tan ka hlan. Ka pain ka chunga a beidawn lohna avangin tun anga sang hi ka thlen theih phah a ni," tiin a sawi. Mariners forward Mallick hi kum 13-a upa a nihin Siliguri-a innghat Sports Association of India (SAI) academy a awm turin thlan a ni a, hei vang hian Kolkata-a piang ni mah se Kolkata Derby khelhna Siliguri-ah hian a mikhual lo hle.
Bagan an hah dawn?
Mohun Bagan-in April 12, Nilaini hian Shillong Lajong an tlawh nghal dawn a, he match zawh hian club dang khelh zat vawi 15 an khel ve chiah ang. March 15, Inrinniah Churchill Brothers hmachhawn turin Goa-ah an zing a, March 19 hian Kolkata-ah Maldives club Maziya nen an khel ang. Match hnuhnung bera Chennai City an mikhual hun tur erawh tihchian a la ni lo.
AFC Cup zawh hian Mariners-in champion tura an elpui Aizawl FC hmachhawn turin Mizoram an rawn pan ang a, April 22-a I League inkhel tur hi Mizo mipui ngaihven a ni. Mizo tlangval Jeje Lalpekhlua chuan, "Champion tur hi sawi lawk theih a la ni lo, kar hnih chhung lekin match li kan khel dawn a, kan zin kual char char dawn tihna a ni. Hei vang hian coach pawhin player a luh chhawktir zel hi a ṭul a ni," tiin Kolkata Derby-a inkhel bul a ṭan loh chhan a sawi.
East Bengal an buai
Season chanve china champion tura rinkai ber East Bengal-in match thum a zawna point an hmuh loh avangin an mangang a, coach Tevor Morgan leh club official inkarah inhmuh thiam lohna awm tih chu phai lam thutharthehdartute ngaihdan a ni. English coach Morgan hian Bagan an hneh loh avanga a hna a chan a nih pawhin a mak lo ang.
Red and Gold hian DSK Shivajians, Minerva Punjab leh Mumbai FC te an la hmachhawn dawn a, an fixture hi harsain lang tawh lo mah se club dang kutah an innghat tawh. Champion tura rinkai zinga mi Aizawl FC-in Churchill Brothers, Mohun Bagan leh Shillong Lajong an la hmachhawn ang.