Hluntei hoin India champion
Mizo nula Lalhlunmawii khelhna India team chuan penalty shootout-ah Chile 3-1 a hnehin Women's Hockey World League Round 2 champion nomawi an chawi.
Pathiannia final inkhelah hun pangngaiah 1-1 in an inhnehtawk. Chile hian inkhel ṭan aṭanga minute ngana lekah Maria Maldonado hmangin goal hmahruai khung mah se India hian Anupa Barla hmangin minute 41-naah penalty corner aṭangin an sut a, goal dang a lut zui tawh lo.
Penalty shootout neih a ni a, India hi 3-1 in an chak zui. India tan captain Rani Rampal leh Monika ten an vuak goal nghal laiin Indian goalkeeper Savita chuan Kim Jacob leh Josefa Villalabeitia te ball vuak a dan sak. Chile tan Carolina Garcia chuan vaw goal ve leh mah se Deepika-i'n India chakn goal a vaw lut ve leh.
India hian nomawi an chawina kawngah hian Belarus (4-0) leh Uruguay (2-1) in an hneh a, heng inkhelah te hian Huntei hi player pawimawh a ni phak. India hian June-July a neih tur Women's Hockey World League semifinal hmun an chang nghal a, World League hi FIH Women's World Cup 2018 khel tur zawnna a ni nghal ang.
Neihloh nula Hluntei chuan, "Ka theihna leh thiamna vang ni loin Pathian vang chauhin hetiang dinhmun hi ka thleng a ni. India tan senior team zinga ka fehchhuah hmasak berah nomawi ka chawi nghal avangin ka lawm takzet. Ka chhungte leh Mizo mipui min lo ṭawnṭai saktu te zawng zawng chungah lawmthu ka sawi," tiin Vanglaini palai a hrilh.
Hluntei hi Thenzawl SAI aṭanga inzir chhuak niin nikum aṭang khan Madhya Pradesh sorkar hnuaia Gwalior Academy-ah a lut thla a, he hmunah hian tun thlengin a inzir zui zel.