Mission Veng hmaah Khatla fiahna
Mizoram Super League champion lai Khatla TBL-in Zarkawt BCA hmaa an mualpho hnuah Zarkawt Serpents sawp mah se fiahna tak tak an la hmachhawn lo. Zanin hi TBL tan fiahna hau tak a ni dawn a, an khingpui tur chu Mission Veng Vikings an ni.
MSL league round hi Hawla Indoor Stadium-ah khelh a ni a, ṭan hun hi zan dar 7:45 niin inkhel en man hi Rs 30 leh Rs 100 a ni.
Kawng hnih
MSL-ah hian semifinal leh relegation playoff kawng a awm tawp a, kawng dang thlan tur a awm lo.
Khatla TBL hian Vikings an hneh chuan semifinal an lut ang a, an chak loh erawh chuan Tuikual South an la hmachhawn dawn avangin relegation playoff khel thei dinhmunah an ding.
Vikings-in match hnih an khelh tawhah chak an la neih loh avangin semifinal lut turin Khatla TBL an hneh a pawimawh a, team dinhmun thlir chuan Vikings hian Chanmari Hollows leh Zarkawt Serpents te nen semifinal hmun ruak pakhat an inchuhah a ngaih theih.
TBL an hlau lo
Mission Vengin an match hnuhnung berah Zarkawt BCA an ngam lo a, amaherawhchu American player Ronald March leh Rikin Pethani ten Aizawl an thlen zanah an ṭhat dan berin an inlan lo a, Mizo player-te nen training vawi khat pawh nei ho lo a nih avangin an khelh dan a inhre hman lo.
Zaninah erawh Lalrina Renthlei leh March te an inthlawp fuh a rinawm tawh a, captain Moses Zoremmawia, Lalruatkima Sailo leh Zonunsanga te pawhin feet ruk leh inches 8-a sang Pethani sanna hmang ṭangkaiin point tam zawk an neih a beiseiawm bawk.
Vikings manager H. Lalhruaitluanga chuan, "March hi TBL player Solomon aiin a sang zawk a, thiamna kawngah pawh kan player a nih vang ni loin kan duh zawk. Garry hi Pethani aiin a hniam zawk a, Vishesh erawh a danglam mai thei. Player pathum chah lut mah se chhawr nghal vek theih a ni chuang lo a, TBL hneh tur hian kan ṭha tawkin ka hria - hlauhna chhan tur bik kan nei lo," tiin chak a inbeisei thu a sawi.
Kan ṭha zawk - Mapuia
Khatla TBL coach H. Laldinsanga chuan, "Kan ṭha zawkah chuan ka ngai a, semifinal tihchian ran hi a pawimawh a ni. Mizo player-te'n state pawn player-te chungah rinna an nghat nasa mah mah a, an penchhuah ve a ṭul tawh a ni," tiin chak a inbeisei thu Vanglaini palai a hrilh.
Champion lai TBL hian Mizo player an neih ṭhat bakah basketball kalhmang hre bel em em Vishesh Bhriguvanshi leh hmabak nei êng Garry Gill bakah American player Solomon te an nei a, MSL-ah a ṭum thum nan champion an tum tih a chiang hle.
# TEAM Pld W L Pts GF GA GD
1 Zarkawt BCA 3 3 0 6 225 195 30
2 Tuikual South BC 3 2 1 5 260 231 29
3 Khatla TBL 3 2 1 5 200 198 2
4 Chanmari Hollows 3 1 2 4 215 223 -8
5 Mission Veng Vikings 2 0 2 2 124 137 -13
6 Zarkawt Serpents 2 0 2 2 126 166 -40