Inkhelh harsatna hmunah Barca Juventus-in Barcelona an hlau lo

European football ngainaute tan men rei zan a her chhuak leh ta. Zanin dar 12:15 hian Juventus chuan Champions League quarterfinal first leg khel turin Juventus Stadium-ah Barcelona an lo mikhual dawn. French club AS Monaco chu Borussia Dortmund khelmualah an lenglut bawk ang.

Italian champion Juventus hian nomawi lian pathum Serie A, Coppa Italia leh Champions League an beisei mek a, an mikhual tur Barca hi La Liga nomawi kawltu an nih bakah Copa del Rey leh UCL nomawi chawi thei an la ni bawk.

Italy leh Spain club lian pahnihte hi an ram league bakah European championship-a sulhnu nei ṭha an ni. Tun ṭum hi vawi riat an inhmachhawnna tur a ni a, tun hma lamin Barca hian Turin club hi vawi thum hneh tawhin Juve hian vawi hnih an hneh let tawh; ṭum hnih dang chu an inhnehtawk - an sulhnu en chuan an inthlau hran lo.

Turin an zam lo

September 11, 2011 khan Juventus Stadium hi hawn a ni a, mipui 41,507 lenna a ni. Massimiliano Allegri kaihhruaina hnuaiah Juve hian tun hnaiah an khelmual hi an hmang thiam hle. Serie A match bik­ah a zawnin match 32 chhung hnehna an chang tawh!

Old Lady (Juve sawina) hian inelna hrang hrangah pawh an khemualah result chhia an nei ngai meuh lo, match 23-ah chak loh nei loin an kaltluang. Tun season Champions League-ah match riat an khelh tawhah vawi ruk an chak a, ṭum hnih chu an khingpuite nen an inhnehtawk - clean sheets vawi ruk an nei thei.

Juve manager Allegri chuan, "Barca hian Messi, Suarez, Neymar, Iniesta leh Mascherano an nei a, midang pawh sawi vek kher ngai loin kan hrechiang. Vawi hnih kan inkhel dawn a, a che fuh hmasa zawkah ṭan kan tum ang. A pawimawh berah chuan goal venhim a ni a, chutihrualin goal khung tur pawhin kan tlarhma an hriam ve tawk bawk," tiin a sawi. Italian manager hian tun season chhunga inkhel hautak ber tur nia a hriat thu leh hnehna chang tura an inpuahchah thu a sawi bawk.

Barca tan MSN

Barcelona-in quarterfinal lut turin Paris Saint-Germain lakah si li an phurh zet hnuah ropui takin an lehthal. Luis Enrique naute hi Champions League-ah chuan thi tawh dam leh ang hial an ni. Catlan club hi duhthusam ang erawhin season an hmang chhunzawm thei bik lo, kartawp an league match-ah Malaga 2-0 in an hneh lo.

Goal venthiam Juventus su ṭhiat turin Barcelona hian Lionel Messi, Suarez leh Neymar te an hmachhuan leh ngei dawn. MSN hian tun season inelna hrang hrangah an club tana an goal khung belhkhawm chu 90 a ni der tawh! PSG an lehthal ṭum hian goal an khung vek.

Argentina captain Messi chuan goal 43 khung tawhin La Liga leh UCL-ah top scorer a ni mek a, Liverpool striker hlui Suarez-a'n goal 32 a khung tawh thung. An zinga goal khung tlem ber Neymar (15 goals) hian assists vawi 19 zet a nei tawh - Juve hian club dang an hmachhawn ang ngawta an mikhual hi an lo dawngsawng a nih chuan an tisual ang.

Barca midfielder Rafinha leh Arda Turan te chuan hliam vangin Turin a pan ve thei lo a, yellow card vawi hnih hmuh vanga hrem tuar Sergio Busquets a inlan thei dawn lo bawk. Enrique chuan midfielder khel thei lo turte hmunruak luah tur hian rawlthar Carles Alena leh Alex Carbonell te a hruai tel.

Spanish manager Enrique-a'n season tawp rualin Nou Camp a chhuahsan dawn. Kum 46-a upa manager hian Barca a enkawl ṭan season anga nomawi pathum chawi chunga a hun hnuhnung hman a duh a nih chuan Juve lakah chetsual a thiang dawn lo.

Juve dang

Club pahnihte intawn hnuhnung ber chu 2015 Champions League final kha a ni. June 6-ah nomawi inchuhna hi neih niin Barcelona hian Ivan Rakitic, Neymar leh Suarez te goal hmangin 3-1 in hnehna an chang. Berlin-a inkhelah hian Enrique-a'n Catalan club a enkawl ṭan kumah hlawh­tlinna a chang nghal a, hemi ṭuma a hneh tak Massimiliano Allegri tho hian zanina a hmachawn tur Juve hi a la enkawl.

Manager pahnih an la danglam lo a, players erawh an danglam tawh. Juve tan 2015 final inkhel bulṭantu zingah Andrea Pirlo, Paul Pogba, Arturo Vidal, Carlos Tevez, Alvaro Morata leh Patrice Evra ten club dang an zawm san tawh.

Juve hian an player langsar tak tak chân mah se Miralem Pjanic, Sami Khedira, Juan Cuadrado, Paulo Dybala, Mario Mandzukic, Guanzalo Higuain leh Dani Alves te an lalut tawh thung. Brazil international defender Alves hi Barca-in contract pawtsei tura an duh reng chunga Turin pantu a ni.

Khawvela player manto pathumna Higuain-a'n Real Madrid tan a khelh laiin Barca hlauhawm zia a hre tawh; Argentine striker chuan, "Team ṭha leh ropui kan hmachhawn dawn a, zaidawh takin kan awm a ngai ang. Player ṭha leh ropui rual awmkhawm an nih avangin kan zah hle, anni pawhin min zah let ve bawk," tiin a sawi.

Season hmasa Serie A match 35 a khelh aṭanga goal 36 khung thei Higuain hian tun season-ah league match bikah goal 21 a khung leh tawh a, kartawpa Chievo 2-0 a an hneh ṭumin goal hnih a khung - Barca tlarhnung tan ngaihthah a thiang dawn lo.

Dortmund fiahna

German club Dortmund-in Bundesliga nomawi an beisei ngam tawh lo a, palina an nih avangin season tharah Champions League an khel ngei dawn em tih pawh a chiang lo. Thomas Tuchel-a naute mikhual tur Monaco hi Ligue 1 hmahruaitu an nih bakah Manchester City pet chhuak thei an nih avangin mikhual nem tak an ni lo ang.