Pavlyuchenkova a champion

Pathianni zan khan Anastasia Pavlyuchenkova chuan world number 1 Angelique Kerber hnehin Monterrey Open nomawi a chawi. Mexico-a inkhelah world number 16 Pavlyuchenkova hian darkar khat leh minute 55 chhungin 6-4, 2-6, 6-1 in hnehna a chang.

Kum 25-a upa Pavlyuchenkova hian set hmasa berah Kerber-i service vawi khat a chhuhsak a, set hnihnaah pawh 5-0 zetin hma a hruai. German nula Kerber-i'n beisei loh takin set la let ve mah se deciding set-ah erawh Russian star bawk a chungnung leh.

Kerber hian Serena Williams lak aṭangin WTA ranking-ah pakhatna dinhmun chhuhsak thei mah se kuminah nomawi a la chawi miah lo!

Hetihlai hian world number 1 hlui Victoria Azarenka chuan fa a neih aṭanga thla sarih hnu, July aṭangin inelna a hmachhawn leh theih tawh tur thu a lo puang ve bawk.