Everton ropuina Romelu Lukaku

Romelu Lukaku-a'n goal khung a ṭhulh thei lo - Belgian striker hian Pathianni zan khan Premier League champion Leicester City lakah goal hnih a khung a, a team Everton chu 4-2 in hnehna a chanpui.

Craig Shakespeare enkawlna hnuaia hartharna chang mek Foxes-in league match nga chhung a zawna hnehna an chan hnuah tlawm hmel an hmu ve ta a, Everton-in match sarih chhung an khelmualah a zawna hnehna an channa chiah a ni thung.

Goodison Park-ah second 30 chauh hun an la hmang hman tihin goal hmuh tur a awm nghal a, Tom Davies chuan Everton tan goal hmahruai a khung. Foxes-in Islam Slimani leh Marc Albrighton free kick ropui hmangin chhanglet nghal mah se Everton-in Lukaku goal hnih leh Phil Jagielka goal hmangin an chhanglet ve leh a, an chak.

Everton-in kar khata £140,000 hlawh tura contract thar an zawrh hnar hlim Lukaku hian Premier League-ah goal 23 khungin top scorer a ni mek a, Everton-in hetiang taka goal khung thei striker an neih hnuhnung ber chu 1985-86 season-a Gary Lineker-a'n inelna hrang hranga goal 38 a khung sak ṭum kha a ni - a chhang a khat hle!

Toffees boss Ronald Koeman chuan, "Romelu Lukaku hi khawvela striker ṭha ber pawl a ni a, kawng tin rengin hma a sawn a ni ber. Everton tana player ṭangkai a nihzia chu mi zawng zawngin an hria a, kan hnena a cham ngei theih nan kan tih theih zawng zawng chu kan ti ang. Mahse, thutlukna siam tur chu player a ni a, Lukaku hian hmachhawp a nei ve tih mi zawng zawngin an hria. Kan chelh ngei theih nan theihtawp erawh kan chhuah ang," tiin a striker chu chelh a tum.