A hming chu Ibrahimovic

"Benjamin Button ang mai ka ni. Puitling sain ka piang a, tha tho takin khawvel hi ka chhuahsan dawn a ni," tih chu Manchester United-in Pathianni zana Sunderland 3-0 a an hneh hnua Zlatan Ibrahimovic thusawi a ni a, hnial ngam an vang ngawt ang!

Kum 35-a upa striker hian minute 30-naah United goal hmahruai a khung a, minute 43-naa Black Cats midfielder Sebastian Larsson hnawhchhuah a nih hnuah Henrikh Mkhitaryan leh Marcus Rashford-ten goal khat ve ve an khung bawk avangin United an chak chiang hle.

Button leh Ibra

"Uaiin ṭha mi ang mai ka ni. Ka upa tawlh tawlh a, ka ṭha tawlh tawlh," tiin Ibra hian a lo sawi tawh a, tunah Benjamin Button ang mai a nih thu a sawi leh ta.

Benjamin hi 'The Curious Case of Benjamin Button' tih thawnthu tawi kum 1922-a F. Scott Fitzgerald-a'n a ziaha a changtupa, kum 2008-a Hollywood film-a siam a nih ṭuma Brad Pitt-a channa a ni.

He lemchanah hian Benjamin hi tar sain a piang a, a tlangval nunah letin a thihni a hnaih meuh chuan nausen a ni - Ibra hian a ṭhat tawlh tawlh thu sawi nan Button nen hian a inkhaikhin.

Tu nge hnial thei?

Kum 35-a upa striker hi ama insawi ang ngeiin a ṭha tawlh tawlh tih hai rual a ni lo. Kum 30 a tlin hnuah season khata goal 30 khung tlin loh a la nei miah lo! Tun season-ah United tan league match 27 khelin goal 17 a khung tawh a, inelna hrang hrangah match 43 khelin goal 28 a khung - tun season-ah pawh goal 30 a khung tling leh ngei dawn niin a lang.

February 5-a Leicester City 3-0 a an sawp ṭum khan Ibra hian league-a a goal 15-na a khung a, Premier League-a goal 15 khung tling thei upa ber a ni - a goal khung lai hian kum 35 leh ni 125-a upa a ni.

A season hnuhnung 12-a league-a goal 10 khung tlin loh vawi khat chiah neitu striker chuan, "Ka thawkrim a, ka inringtawk a, enge ka tih theih tihah hian ka chiang. Ka kum tam tawh mah se tawnhriat ka ngah phah a, ka fing sawt a, ṭul loa tha senna ka pumpelh ṭhin," a ti.

Ibra karah Shaw

Swede striker ropui Ibra-a'n goal a khung reng avangin sawi a hlawh a, Pathianni zana Ibra piaha ngaihven hlawh chu Luke Shaw a ni. English defender hi tun hnaiah manager Jose Mourinho chuan thawkrim tawk lo leh team tana inpe tawk lo tiin a sawisel a, Sunderland lakah erawh inkhel bul ṭantir a ni.

Kum 21-a upa defender hian a hun ṭha neih a khawhral lo. Mkhitaryan goal khung tur a siamsak bakah he inkhela captain armband hrengtu Marouane Fellaini tan chance ṭha tak a siamsak bawk. Mahse, minute 61-naah lakchhuah a ni thung.

United boss Mourinho chuan, "Shaw ka lak­chhuah chhan chu mipui aṭanga beiseina a san vang leh yellow card a hmuh vang kha a ni. Darkar khat chhung ṭha takin a khel a, tihsual a neih loh bawk avangin ka lawm takzet a ni," tiin a sawi.