Vinales a tlân chak ber

MotoGP intlansiak pa­hnihna Argentina Grand prix chu Pathianni zan khan tlan a ni a, Spanish rider Maverick Vinales chu pakhatna a ni. Champion lai Marc Marquez erawh intlansiak a tlan tluan thei lo thung.

Gran Premio Motul de la Republica-ah parukna aṭanga bul ṭantu Vinales-a’n bul a ṭan ṭha leh hle a, lap hmasa berah rider pathum tlanpel nghalin lap 25 an tlan zawh meuh chuan harsatna nei loin pakhatna a ni.

Tun season ṭanga Yamaha bike khalhtu Vinales hian tun season-a intlansiak hmasa ber Qatar Grand Prix-ah hnehna a chang tawh bawk. Yamaha rider zingah Wayne Rainey (1990) tih lohah chuan Vinales hi he team tana intlansiak hma­chhawn hmasak pahniha pakhatna ni kawp thei hmasa ber a ni.

Pole position aṭanga bulṭantu Marquez chu lap lina lek­ah chesualin intlansiak a tlan tluan thei lo. MotoGP intlansiak vawi 350 a hmachhawnnaah Valentino Rossi chuan lap 19-naah Cal Crutchlow tlan pelin pahnihna a ni a, British rider hi pathumna a ni thung. World champion vawi thum ni tawh Jorge Lorenzo chu kawng kawi hmasa berah Suzuki rider Andrea Iannone nen an intihpalhna lamah a chesual bawk.

Italian rider Rossi chuan, “Intlansiak kan zo chiah a, Vinales nen kan inkarah 2.9 seconds pawh a awm tling lo tih ka hre thei. Mahse, bike intlansiakah chuan hei hi a tam hle. Qatar nena khaikhin chuan ka taksa a fit ṭhain in­tlansiak pawh nuam ka ti hle a, rider champion nih tum mah ila team kan chetṭhat avangin lawmna tur a tam,” tiin a sawi.

Kum 22-a upa Vinales hian intlansiak pahnih aṭanga point 50 hmuin rider championship-ah hmahruaitu a ni a, a teammate Rossi aiin point 14-in an sang zawk. Tun season intlansiak pathumna atan April 24 zanah Grand Prix of the Americas an tlan leh ang.

Argentina MotoGP Results
# Rider Ram Team
1 Maverick Vinales Spain Yamaha
2 Valentino Rossi Italy Yamaha
3 Cal Crutchlow Britain Honda
4 Alvaro Bautista Spain Ducati
5 Johann Zarco France Yamaha
6 Jonas Folger Germany Yamaha
7 Danilo Petrucci Italy Ducati
8 Scott Redding Britain Ducati
9 Jack Miller Australia Honda
10 Karel Abraham Czech Republic Ducati