Championship khel tur Sheffield United
Sheffield United chuan Championship-a kum ruk chhung an hmel an lan tawh loh hnuah English football-a club inelna sang ber dawttu league an khel ve leh dawn ta - Northampton Town chu khualmualah 2-1 in an hneh a, goal an chhuah hmasak zet hnuah Leon Clarke leh ohn Fleck-te goal khung hmangin an 'comeback' a ni.
Blades (Sheffield United sawina) hian an hmabak match li aṭanga point li an hlawh chhuak thei a nih chuan an champion bawk ang. An hnuai chiaha awm Bolton Wanderers chuan hmahruaitu Sheffield hi point kuain phak lo mek mah se pathumna Fleetwood aia point sarih laia an san ve tho avangin Premier League club pawh lo ni ve tawh ṭhin Bolton tan Championship-a kir turin an dinhmun a ṭha hle.
Sheffield manager Chris Wilder hian season hmasa khan League Two-ah Northampton a enkawl a, League One a inhlankaipui. Championship lama kir duh Sheffield hian player a nih laia an defender hlui hi lalutin Championship a kaipui leh ta - record chhuanawm bik a ni.
Naupan lai aṭanga Sheffield ṭantu manager chuan,"A ropui thlawt a, nunphung thlak danglamtu leh thinlung thlenga min dektu a ni. Kan chak ruala kan awm dan leh dressing room-a kan lawm dan thleng khan kumkhuain keimahah hian a cham reng tawh ang," tiin a sawi.