Championship Player of the Year Knockaert

Premier League hnuai lama English Football League club-te pual award sem a ni a, Championship Player of the Year-ah Anthony Knockaert chu thlan a ni.

Kum 25-a upa winger hian Brighton & Hove Albion-in season thara Premier League khel tura beiseina an neihna kawngah a thawhhlawk takzet a, league match 40-a khelh tawhah goal 13 khungin assist vawi riat a nei thei a ni.

French winger Knockaert hian chawimawina dawng tur hian Leeds United striker Chris Wood leh Newcastle United striker Dwight Gayle te a khum a ni. League One-ah Sheffield United striker Billy Sharp chu Player of the Year-ah thlan a ni a, League Two-ah Doncaster Rovers striker John Marquis aia thiam an awm lo.

Exeter City forward Ollie Watkins chu Young Player of the Year-ah thlan a ni a, Brighton midfielder Steve Sidwell chuan November thlaa Bristol City lama yard 50 aṭanga a goal khung ropui hmangin 'Goal of the year' chawimawina a dawng bawk.

Birmingham City leh Peterborough United boss hlui Barry Fry chu EFL lama a hnathawh ropui avangin Contribution to League Football Award pek a ni a, kum 72-a upa coach chuan, "Wembley-ah vawi li team ka kaihhruaiin ka chak vek tawh a, league leh cup-ah ka champion tawh bawk. Mahse, vawiina ka chawimawina dawn hi chung zinga ropui ber chu a ni," tiin a sawi.