Andreescu inhnukdawk

US Open champion lai Bianca Andreescu chu a khup hliam vangin a inkhel thei lo mek a, January 20 aṭanga khelh ṭan tur Australian Open aṭangin a inhnukdawk.

Canadian nula, tun dinhmuna world number 6 nilai hi season hmasa tawpa khelh WTA Finals-ah khan a inhliam a, a hliam vang hian tun season atan inbuatsaihna pawh a nei mumal thei lo.Melbourne khawpuiah inlan theih a inbeisei a, a hming pawh pe lut ngei mah se tun dinhmunah a la inkhelh mumal theih loh avangin atan Grand Slam khelh beisei ngam chi a ni tawh lo a ni.

Kum 19 mi Andreescu chuan, "Zawi muangin hma ka sawn zel a, mahse ka tan chuan Australian Open hi a hma rih lutuk deuh a ni. Nakin hun lo kal zel tur ngaihtuah chungin ka chawlh rih hi a ṭha zawk," a ti. Season hmasa khan Australian Open-ah hian second round a thleng. Australian Open-ah hian mipa singles player langsar Juan Martin Del Potro pawh a khup dinglam hliam a la dam loh avangin a inlan thei dawn lo. Argentine tlangval hi nikum June thlaa zai a nih hnuah a la inkhel mumal leh thei lo.