Sunrisers tan ni a êng mawi

Indian Premier League khelh mekah Sunrisers Hyderabad chuan match hnih an hmachhawn tawhah vawi hnih hnehna an chang ta - Pathianni zan khan Gujarat Lions chu wicket kua ngawtin an sawp.

Rajiv Gandhi International Stadium, Hyderabad-a inkhelah Gujarat Lions an bat hmasa zawk a, over 20-ah run 135 chiah siamin mi pasarih an hloh. Gujarat tan run 37 siamtu Dwayne Smith chu run siam hnem ber a ni a, over li a vawma wicket thum la a run 19 chiah petu Afghan bowler Rashid Khan an ngam lo.

Sunrisers bat hun a thleng a, over 15.3-ah wicket khat chiah hlohin an target an khum der! Mualneitu team tan opener leh captain ni bawk David Warner chuan run 75 zet a vaw chhuak a, a tawp thleng a dam.

Warner-a opening partner Shikhar Dhawan-a'n run kua bak a siam hman lo tihah out mah se Warner pui turin Moises Henriques a rawn ding chhuak a, Australian batsman hian ram tana a khelhpui Warner a pui ṭha a, run 52 zet vaw chhuaka a tawp thleng damin Hyderabad an chak chiang hle.

KKR an chuai

Kolkata Knight Riders-in IPL-a an match hmasa berah Gujarat Lions chu wicket 10 zetin sawp mah se an match hnihnaah erawh beisei an phak lo nghal a, Pathianni zan khan an mikhualna ramah Mumbai Indians chu wicket liin an hneh lo.

KKR an bat hmasa zawk a, over 20-ah run 178 siamin wicket sarih an hloh. KKR tan Gujarat an sawp ṭuma an pahnih chauha a tawp thleng dama team chakpuitu opener Gautam Gambhir (19 runs) leh Chris Lynn (32 runs) ten beisei an phak lo a, run 81 siamtu Manish Pandey awm lo se KKR hi mualpho tur an ni.

Mumbai Indians bat hun a thleng a, an batsman zingah che ṭha fal tia sawi tur awm lo mah se Nitish Rana (50 runs), Parthiv Patel (30 runs), Jos Buttler (28 runs), Hardik Pandya(29 runs) te an inthlawp ṭhat avangin over 19.5-ah wicket ruk hloha an target umphain hnehna an chang.

Zanin dar 8:00-ah inkhel pakhat a awm dawn a, Rising Pune Supergiants leh Delhi Daredevils an inhmachhawn ang.