Manchester United-in 3-na nih an tum Anthony Martial-a'n hattrick a siam

Manchester United-in Nilaini zan khan Sheffield United 3-0 in an sawp a, Anthony Martial-a'n hattrick a siam. French forward hi United player zinga Robin van Persie hnua hatrrick siam leh thei hmasa ber a ni.

United hian point thum an hlawhchhuah avangin panganaah an awm chhunzawm a, chutihrualin pathumna Leicester City chu khelh zat inangah point ruk chiah an pha tawh lo. Red Devils boss Ole Gunnar Solskjaer chuan inkhelh banah pathumna nih an tum thu a sawi.

Sheffield United-in keeper Dean Henderson leh defender rinrawl John Egan te an chhawr theih loh laiin Manchester United-in midfield-ah Paul Pogba leh Bruno Fernandes te an dah kawp a, sawi hlawh lo ber Nemanja Matic pawh Chelsea champion ṭuma player pawimawh a ni.

Fernandes hi Anthony Martial hnungah awmin Mason Greenwood leh Marcus Rashford ten an thlawp a, Matic leh Pogba te tlarhnung puitu a nih rualin French midfielder hian zalen taka tlanchhuah phalna 

a nei thung.

Pogba ball khawih a hmuhnawm a, French midfielder ke aṭanga chhuak a fuh ṭhin hle. Fernandes-a'n a tih tur chin a hria a, a ṭul hunah goal-ah a pet theih bakah dam dapa ball a khawih ṭhin chuan United team-a danglamna thlentu a nihzia a pholang a, chutihrualin defender hmaah midfielder pathumna Matic-a nghet ṭha takin a ding tih hriat a ṭha bawk.

Manchester United leh Tottenham inkhelh ṭumin Anthony Martial a bil a, French forward hi bench lamah ṭhu hahdam rih se titu pawh an tam. Sheffield United lakah erawh goal khung tura rin hlawh zawk Rashford aiin a hriam tlat. 

Minute 7-na lekah Rashford cross kawh zet chu Martial-a'n khawih zeuhin goal-ah a chantir a, keeper Simon Moore tan chet ngaihna awm lo. Minute 44-naah United-in mual dinglam aṭang bawkin Sheffield tlarhnung an ṭhiat a, Aaron Wan-Bissaka cross chu Martial-a'n a khung leh bawk. 

Second half-ah goal khat tawih zet a luh belh a, Martial leh Rashford ten wall pass hmanga Sheffield tlarhnung an ṭhiah hnuah French forward hian minute 74-naah hattrick siam nan keeper Moore a chip khum. 

United-in Premier League nomawi an chawi hnuhnun ber ṭum khan Robin van Persie-a'n Aston Villa lakah April 2013 khan hattrick a siam a, Sir Alex Ferguson-a'n manager hna a chawlhsan hnuah United player hattrick siam leh hmasa ber chu Martial a ni.

Team ṭha zawk United-in inkhel an thunun a, inkhelh ṭan tirh lamah Rashford-a'n chance ṭha bik ṭum hnih hlah lo se Ole Gunnar Solskjaer-a hote goal tam zawkin an chak thei ang. Chutihrualin United tan an elpui Sheffield lakah point thum hlawhchhuah a hlu a, Champions League khelh beiseina an nei sang sawt dawn.

Manchester United manager Ole Gunnar Solskjaer chuan, "Engtiklai mahin palina nih kan tum thu kan sawi lo. Pathumna nih kan duh a, kan match khelh apiangah kan rilru kan pek a ṭul a ni. Kan hmaah FA Cup leh Europa League khelh tur a la awm bawk. A tawpah chuan point kan chhiar ang a, kan chungah team hnih chiah an awm thei maithei a ni," tiin Liverpool leh Manchester City tih loh chu an la umphak theih thu a sawi.

Sheffield United boss Chris Wilder chuan, "Kha aia ṭhaa khel thei tur kan ni a, ho lam taka ball kan hloh chuan kan tuar ṭhin. Goal kan chhuah hma lutuk a, kan tan thawhchhuah a harsa tawh a ni," tiin a naute khelh dana a lawm loh thu a sawi.