UCL khelh tumte
Liverpool-in UCL an khel chiang tawh a, champion turin point hnih chiah an mamawh tawh. Nizan lama Man City an chak zo lo a nih chuan Reds hi an champion tawh dawn. Jurgen Klopp-a hote hian Man City, Aston Villa, Brighton, Burnley, Arsenal, Chelsea leh Newcastle te an la hmachhawn dawn.
Man City erawh hremna hmachhawn thei dinhmunah an ding a, CAS hnenah an zualko mek. Hremna an pumpelh a nih chuan UCL khel turin an tling ngei ang. Nizan khan Man City hian Chelsea an hmachhawn a; Liverpool, Southampton, Newcastle United, Brighton, Bournemouth, Watford leh Norwich City te nen an la inkhel dawn.
Leicester City-in hnuah match hnih khel tawhin point hnih chiah an hmu a, dinhmun ṭha takah ding mah se chesual thei an la ni. Foxes la hmachhawn turte chu Everton, Crystal Palace, Arsenal, Bournemouth, Sheffield United, Tottenham leh Manchester United te an ni.
Chelsea-in Aston Villa an hneh a, point thum hlu tak an hlawh chhuak. Blues hian nizan khan Man City an hmachhawn a; West Ham, Watford, Crystal Palace, Sheffield United, Norwich City, Liverpool leh Wolverhampton Wanderers te nen an la inkhel dawn.
Manchester United-in an elpui Tottenham Hotspur lakah point khat an hlawh chhuak hnuin Nilaini zan khan Sheffield United 3-0 in an sawp. United la khelhpui turte chu Brighton, Bournemouth, Aston Villa, Southampton, Crystal Palace, West Ham leh Leicester City te an ni.
Wolverhampton Wanderers-in West Ham leh Bournemouth an hneh avangin UCL beiseina an neih belh zel. Wolves hian Aston Villa, Arsenal, Sheffield United, Everton, Burnley, Crystal Palace leh Chelsea an la hmachhawn dawn.
Tottenham Hotspur-in Man United lakah point khat an hmu a, West Ham an hneh leh tak avangin UCL beiseina a nung thar hle. Spurs la hmachhawn turte chu Sheffield United, Everton, Bournemouth, Arsenal, Newcastle, Leicester City leh Crystal Palace te an ni.
Sheffield United-in Covid-19 hnuah result an nei ṭha tawk lo. Blades hian Aston Villa lakah point khat chauh an hlawh chhuak a, Newcastle leh Manchester United lakah 3-0 in an tlawm ve ve. Champions League chauh ni loin Europa League khel lo thei dinhmunah an ding. Sheffield hian Arsenal, Tottenham, Burnley, Wolves, Chelsea, Leicester City, Everton leh Southampton te an la hmachhawn ang.
Crystal Palace-in Bournemouth hnehin bul ṭan mah se Nilaini zan khan Liverpool lakah 4-0 in an mualpho. Palace hian Burnley, Leicester City, Chelsea, Aston Villa, Man United, Wolves leh Tottenham te nen an la inkhel ang.
Arsenal-in Man City leh Brighton an hneh lo a, UCL khelh a harsa dawn. Gunners hmachhawn turah hian Sheffield United, Norwich City, Wolves, Leicester City, Tottenham, Liverpool, Aston Villa leh Watford te an
la awm.