PSG tan Neymar goal a tawk lo

Footballer manto ber Neymar-a'n Paris St-Germain tan penalty chhuh lut mah se hnehna chan nan a tawk zo lo, an mikhual Bordeaux nen 2-2 a inhnehtawkin tun hnaiah a zawnin point an hloh.

PSG hian an match hmasa zawkah AS Monaco chu 3-2 in an ngam lo, goal hnih an neih tawh sa an hum lo. Bordeaux lakah pawh si phurh an sut hnuah hma hruai let thei mah se an goal an hum zo lo nawn leh a ni.

Timothee Pembele-a'n anmahni lama a tih luh vangin PSG an hnufual a, forward Neymar chuan a sut. Everton aṭanga an hawh Moise Kean chuan Ligue 1 champion tan khung belh mah se Yacine Adli chuan sut lehin point an insem.

Thomas Tuchel-a naute hian match 12 aṭanga point 25 neiin hma an la hruai tho a, pahnihna Lille chuan khelh hmabak an neihah hnehna an chang a nih chuan an nihrual thei ang. Match 10 khelh aṭanga point 21 nei Marseille chuan an hnaih hle bawk.

Brazilian forward Neymar chuan, "Hmasawn kan ngai hle, kan insiamṭha vat a nih loh chuan Ligue 1 bakah Champions League thlengin a harsa dawn. Goal khung theihna hun ṭha bawhpelh loh kan zir a ngai," tiin a sawi.

French champion hian Nilaini zanah Manchester United an tlawh dawn, Old Trafford a inkhel hi Champions League group H hmahruaitu nih inchuhna a ni dawn a, team pahnih hi tla thut thei an la nih bawk avangin a hmuhnawm ang.