Mizo boxer rothap NT Lalbiakkima'n a duh a hmu ta - WBC Asia continental title fight 'rematch' chu a duh ang ngeiin a nei thei dawn a, Jayson Vayson nen Siaha boxer hi an intawng leh dawn.
June 19 zan khan NT-a hian Philippines boxer ṭha Jayson Vayson hi a ngam lo a, Sheikh AL Maktoum Hall, World Trade Centre, Dubai-a inhnekah hian split decision hmangin NT-a hi tlawmah puan a ni.
Dubai khawpuia an inhnek result-ah Mizo boxer a lawm thei lo a, chutihrual chuan kha fight hmuhnawm em em kha inhnek buaipuitu lamin en leh an lo châk em em bawk!
NT-a leh organiser ten inhnek zanah rematch neih an duh thu an sawi nghal a, mahse, a inhnekpui tur ber an rem ve a ngai - Thawhṭanni zan khan Jayson ten rematch neih an remti a, NT-a leh Filipino boxer ṭha an intawng leh dawn.
Intawng leh ngei ang aw... Mizo legend CFL Hmingthanga'n, "Intawng leh ngei ang aw," tih hla a phuah kha chu a hmangaih em em tawn leh a duh vang a ni a, NT Biakkima'n, "Intawng leh ngei ang aw," a tih chhan erawh Jayson a hnek leh châk vang a ni thung!
Mizo professional boxer zinga round 10 inhnek hmasa ber NT-a hian Dubai khawpuiah khan a chak ngeiah a ngai a, mahse, judge pathum zinga pahnihin chak lo zawkah an ngaih miau avangin a duh ber title a hlawh chhuak zo lo.
NT-a thinlung na thawidamna tur ṭha ber chu Jayson nena intawn leh a ni a, Siaha tlangval hi a duh chu pek a ni a, a tlawm leh a nih ngat chuan world number 1 meuh pawh lo hneh tawh boxer tan mualphona a ni ang.
IBA intercontinental champion lai NT-a chuan, "Kei chuan ka tlawm tih kha ka la pawm lo a, ka tlawmah ka ngai lo hrim hrim. Ka chak tih pholan a ngai," tiin Vanglaini a hrilh a, kawnghren chu a kawnga hren atan a mawi zawk a ring tlat.
October 29? NT-a te inhnek buaipuitu Roshan Nathanial chuan Vanglaini zawhna chhangin October-ah rematch hi neih tura ruahmanna siam a nih thu a sawi a, October 29, Inrinni zanah boxer pahnih an intawn leh tur thu a sawi.
Boxer pahnih hi Dubai khawpuiah an intawng nawn tawh dawn lo a, a tirah Goa hming lam rik ni mah se a hnuah Aizawl hming a ri leh a, Roshan chuan, "Aizawlah a ni ang," tiin Vanglaini a hrilh.
Chutihrual chuan a hun leh hmun hi ruahmanna chauh a la ni tih hriat a ṭha a, buaipui tur tam tak a la awm dawn avangin chiang taka engkim sawi ngam a la harsa.
Aizawla inhnek thleng tur hian a hmun hma piahlamah inhnek tura rawn zin boxer-te thlenna tur hotel, an training-na hmun tur leh thil dang tam tak buaipui ngai a la awm - Aizawla an chet tlatna turah boxer-te an lungawi ve phawt a ngai.
Judge thlirna Dubai khawpuia NT-a leh Jayson an inhnek khan judge pakhat Birzhan Zhakypov chuan Siaha boxer hi chak zawkah a ngai a, Vanglainiin scorecard-a hmuha a lan danin round 10 an inhnekah round pasariha chak zawkah NT-a hi a puang a, 97-93 in a chaktir.
Mahse, judge dang pahnihin NT-a an chaktir tlat lo. Serikzhan Yeshmagambetov chuan round sarihah Jayson a chaktir zawk ve thung a, 97-94 in Filipino boxer hi a chak zawkah a puang.
Judge zinga pakhat Marat Shalabayev chuan round rukah Jayson a chaktir a, round liah NT-a a chaktir thung - a tawpa a score zat chu 96-94 niin Siaha boxer a tlawm zawkah a ngai.
Inhnek endiktu pathum zinga pahnihin Jayson a chak zawkah an ngaih miau avangin split decision-in (97-94, 93-97 & 96-94) NT-a a tlawm a, belt hawn tur nei loin a lo haw a ṭul phah.
Keimah Zo Keite NT-a chuan, "Jayson kha boxer ṭha tak a ni tih ka hre sa a, a harsa dawn tih pawh ka hre sa. Mahse, kan inhnek chiah khan ka beisei aiin a ṭha lo tih ka hmu a, ka tlawma an ngai kha chu ka tan pawm a harsa a ni," tiin Vanglaini a hrilh.
Zo Keite hian Mizoram a rawn kir hnuah pawh a inbuatsaihna a chawlhsan lo a, October-a Jayson nen an intawn leh tur thlir lawk chungin kawng engkimah a inbuatsaih chhunzawm.
NT-a chuan, "Dubai fight atan khan duh ang zanin inbuatsaihna ka nei thei lo a, Jayson ka hmachhawn khan chak zawkah inngai mah ila, keimahah chuan ka ṭhat lai ber a ni lo tih erawh ka pawm.
"Ka ṭhat dan berin Jayson hi hmachhawn ka tum tawh dawn a, a hma ai zawnga nasain ka bei dawn a ni," a ti a, Zo Keitein tlawm hlen a tum lo - ilo thlir phawt ang hmiang!