Saidan Football Academy trial chhunzawm dawn

Sports & Youth Services Department chuan nimin aṭang khan RG Stadium, Mualpuiah RSTC Saidan Kolasib Football Academy 2022-2023 session-a awm tur trial an buatsaih a, vawiin chawhma dar 10 aṭangin trial hi chhunzawm a ni ang.

Trial-ah hian bend and reach (flexibility), vertical jump (explosive), standing broad jump (strength), 6x10 shuttle run (agility) leh 1 min sit up (core strength) te neihtir an ni. Nimin khan naupang 100 bawr velin an chhim a, heta thlante hian June 23, Ninganiah final selection an nei leh dawn.

Final selection-ah hian 800m (endurance) bakah match khelhtir an ni ang. Vawiin hian a duh apiang tan trial hi chhim theih a ni dawn a, ni tawp ber June 23-ah pawh hian kawng chhia leh harsatna dang vanga ni hmasa pahnih hmachhawn thei loh tan trial hi a la chhim theih ang.