Zarkawt BCA an tho chhuak leh nghal
Mizoram Super League champion lai Zarkawt BCA an chesual zauh a, rang takin an insiam ṭha. An chak loh hnua an match khelh leh hmasak berah BCA hian Chawnpui chu 105-76 in an hneh.
Thawhṭanni zana R. Dengṭhuama Indoor Stadium, Mualpuia inkhelah BCA hian bul an ṭan fuh zawk, quarter hmasa pathumah an chungnung vek. A hnuhnung berah point liin hniam ve mah se, a pumpuia an san falna chu point 29 zet a ni ta tho.
BCA hian match nga an khelh aṭanga point kua hmuin hma an hruai a, a sang pali zinga tel tlang turin an dinhmun a ṭha tawh. Chak lo Chawnpui erawhin chak ni hmel an la hmu thei lo, match nga an khelh tawhah an tlawm vek.
Hmabak a hautak
Season hmasa khan hripui lengin Mizoram Super League hi a bawh buai viau tawh, kuminah harsatna em em tawk loin khel thei mah se hun a chawpchilh a, chawlh hahdam pawh nei loin an khelh chhunzawm nghal zel a ngai.
Zarkawt BCA hian vawiin tlai dar 5:00 hian Mission Veng Hotshots an tum leh nghal dawn, tunkar chhungin Chanmari Vikings bakah Chawnpui bawk hi an la hmachhawn leh hman dawn avangin hun awl an nei thei dawn lo.
Chawnpui laka point 20 neitu Lalrina Renthlei chuan, "Match a bichilh khawp mai a, squad kan insiamrem pawh a ngai dawn viau. A tira player panga lut ringawt ni loin, bench aṭanga lut player pawh an pawimawhna a sang dawn," tiin Vanglaini a hrilh.
Tuikhuahtlang star Lalrina bakah Matthew Remtluanga Sailo leh Zonunsanga te hi BCA rinrawl an ni ṭhin. Tuikual lakah Zonuna awm loh a hriat a, tunah erawh tualchhung player ṭha pathum an inkawp rem leh tawh, team dang tana hmachhawn hautak tur an ni ang.
A chung inchuh
MSL 7-ah team thar kan hmu, an hming chu Mission Veng Hotshots an ni. Hotshots hian beisei phak baka ṭhain season an hmang, table-ah pahnihna ni mah se, vawiin tlaiah Zarkawt BCA an hneh a nih chuan an point hmuh zat an hmu dawn.
MSV Hotshots coach David Lalruatfela chuan, "BCA hian point an nei hnem ṭhin, chuvangin inveng fimkhur tak chunga kan khelh a ngai dawn. Chutihrualin keini chuan kan khingpui apiang theihtawpin kan hmachhawn ṭhin.
"Tun ṭumah pawh hian theihtawp kan chhuah dawn," tiin Vanglaini a hrilh. A player hliam Johny Lalhruaitluanga a dam tawh a, player ṭhenkhat damlo pawh an dam tawh, zaninah an ṭhat dan berin an khel thei dawn.
Hotshots pawh hian tun kar chhungin BCA bakah Khatla TBL leh Tuikual South te an la hmachhawn dawn, coach David-a chuan a player an fit ṭhat avangin insiksawi nasat vak ngai loin inelna an hmachhawn theih a beisei tih a sawi bawk.
Chawnpui dinhmun
An khelh tawh chinah Chawnpuiin hneh an la nei lo, an chak lo fai vek. Chawnpui hian Mizoram pawn aṭanga player chah luh an nei ve lo - tualchhung player hlanga Mizoram Super League khel awmchhun an ni.
Mizoram chhung player zingah pawh a ṭha ṭha an lakhawm lo, anmahni veng player chu a tam zawk an ni. Khelh hmabak la nei nual mah se a sang pali zingah an tel phak dawn lo tih a sawi ngam, chutihrualin team ṭha lakah basket an nei hnem ṭhin viau.
Zanin dar 8:00-ah Chawnpui hian Tuikual South an hmachhawn leh nghal dawn. Phengphehlep hi hriatthiam an harsa - team ṭha Zarkawt BCA an hneh hnu lawkah Chanmari Vikings an ngam lo, zaninah erawh chak tura rinkai zawk an ni ang.
Chawnpui tih loh team dang panga an inkhel tawk hlawm viau, chuvangin 'Play In' khel tur rin thiam a harsa. Hun chep tak kara match an neih hnem hlawm dawn avangin squad nei chhah deuh chu an dingchang tura ngaih a ni.