Wimbledon khelh ka la tum reng - Murray

A pum lam chiang lo vangin Andy Murray-a'n duhthusamin training a la zawm thei lo. Britain tlangval hian June 27 aṭanga khelh tur Wimbledon-ah erawh inlan ngei a la tum thu a sawi chhuak.

June 12 khan Stuttgart Open final-ah Murray hian Matteo Berrettini a ngam lo, inkhel tawp lamah pum na vangin Murray hi a buai, chak loh chhuanlam atan hmang chiah lo mah se a ṭhat dan berin a khel chhuak lo.

Wimbledon 2013 leh 2016 champion Murray chuan, "Ruahmanna leh ka duh dan chu a la pangngai reng, a theih hram chuan Wimbledon hi khelh ka tum, natna pawh a ziaawm chho zel.

"Mahse, a nihna tak sawi chuan duhthusamin ka la training thei lo, hun tlemte la awmah hian ngai ka awh hman chiah lo a nih pawhin tournament chu ka khelh theih hram ka beisei," tiin a sawi.

Murray hi tun dinhmunah chuan world number 51 a ni mek. Season hmang ṭha lo mah se grass court-ah result a nei ṭha angreng viau a, tun hma lama a ropuina ang kha la nei let chiah lo mah se beiseina a la nei reng.

Russia leh Ukraine buaina avangin Wimbledon-ah hian Russian leh Belarus player an inlan thei dawn lo. Mipa leh hmeichhe tennis thuneitu sang ATP leh WTA chuan world ranking point an chhiar loh tur thu an sawi ve nghal bawk.

Mipa world number 1 Daniil Medvedev a inlan thei dawn lo a, champion lai Novak Djokovic erawhin inlan ngei a tum. Ke phah hliam enkawl lai Rafael Nadal dinhmun a chiang lo, a dam hman chuan inlan hram a tum thu a sawi ve thung.