Warriors-in NBA nomawi an lawm

Golden State Warriors chuan NBA title an lak chu an lawm. Thawhṭanni tlai khan San Francisco kawtthlerah basketball thiam ber an nih lawm nan hian kawng an zawh a, kawngpui leh a chhehvelah Warriors ṭantute an fuankhawm hnem hle.

Basketball inelna sang berah Warriors hian tun hnai kum riat chhunga a vawi li nan title an la thei. Tun hnai season hnih chhungin playoff khel phak lo khawpin hniam mah se, kuminah erawh an nihna tak an lantir thei leh ta.

An champion hnuhnung zawk chu 2018 kha niin, a hnuah Kevin Durant a chhuak. Durant awm lo mah se Stephen Curry, Klay Thompson, Draymond Green leh Andre Iguodala te an la awm miau a, an champion hi a mak hran lo.

Player ṭha palite hian a huhoin NBA nomawi vawi li an chawi tling ta chiah. Kumina an hlawhtlin theih nan hian 2020 aṭanga an neih Andrew Wiggins a thawhhlawk a, a bul ṭantu zingah a tel phak.

Guard Jordan Poole pawh sawi hmaih theih a ni lo, ani hian regular season bikah khan match 51 zet bul a ṭan. Hliam vanga Thompson a chawlh reng lai pawh khan a hmun ruak lo luahkhat ngar ngartu a ni a, a hnathawh a ropui hle.

Poole chuan, "Theihtawp kan chhuah a, kan phak tawkin kan thawkrim bawk - chumi hnua hlawhtlinna chan chu lawmawm tak a ni," tiin a hun tawn chungchang a sawi a, an tan season ṭha tak a nih thu a sawi bawk.

NBA Finals 2022-ah Golden State hian Boston Celtics chu series-ah 4-2 in an hneh a, a vawi sarih nan basketball inelna sang berah hian an champion. An chak theih nana thawh hlawk tak Curry chu NBA Finals MVP atan an thlang a ni.