Lukaku leh Dybala lak kan tum - Inter CEO

Inter Milan chief executive Giuseppe Marotta chuan team thuam chak an tum thu a sawi a, tun nipui bazar chhung hian Chelsea striker Romelu Lukaku leh Juventus forward hlui Paulo Dybala te lak an tum thu a sawi.

Nipui bazar hmasa khan Lukaku hian Inter Milan aṭangin Chelsea hi a zawm, pound maktaduai 97.5 man zet niin kar khatah £325,000 a hlawh mek. An beisei ang erawh chuan a khel phak lo.

Season hmasa khan Chelsea tan inelna hrang hrangah goal 15 a khung. Premier League bikah match 26 a khelh aṭangin goal riat chiah a khung. FA Cup leh League Cup final thleng mah se a chak lo zawkah an ṭang.

A club hlui Inter hian a lung a la tileng reng a, khawthlang media-ten an tarlan dan chuan a hlawh tihniam chunga kir leh pawh a hreh lo. A ngheta an la kir thei lo a nih pawhin loan tala an hawh let a rinawm.

Marotta chuan, "Lukaku leh Dybala te lak kan tum, tunah hian kan inbe mek, kan hnenah an rawn kal thei a nih chuan a lawmawm khawp ang. Sum leh pai dinhmun ngaihtuah tel a ngai a, anni pahnih kan la thei lo a nih chauhin midang kan ngaihtuah ang," a ti.

BBC tarlan dan chuan, striker tharum ngah Lukaku hi Inter president Steven Zhang chuan laklet ngei a duh. Chinese sumdawng hausa hian a player duh lak nan chuan sum a hmang huai deuh bik a nih pawhin a mak lo ang.

Dybala pawhin Juventus tan a contract a hmang zo tawh a, Old Lady hi a mangṭha fel tawh. Serie A kalsan ai chuan Champions League khelh theihna ni bawk Inter pan hi a hreh lo niin an sawi, thil chianga sawi theih erawh a la ni bik lo.