Man United-in Eriksen an beisei

Manchester United chuan Denmark midfielder Christian Eriksen chu season thar atan lakluh theih an inbeisei. Kum 30 mi Eriksen hian season liam ta chawhnu lam kha Brentford tan ṭha takin a khel a, thla ruk chauh contract a ziah a avangin a thlawna lakluh theih a ni.

Eriksen hi a khelh mekna Bees-in chelh an tum a, a club hlui Tottenham Hotspur pawhin lakluh an duh. Amaherawhchu Bees leh Spurs hi Eriksen-a'n inremna a la neihpui lo a, Man United tan Old Trafford-a lakluh theihna kawng a inhawn phah.

Euro 2020 kha
Nikuma neih Euro 2020-ah khan Eriksen hi Denmark team tana feh chhuak zingah a tel a, an match hmasa bera Finland nen an inkhelh ṭumin nikhaw hre loin Eriksen hi a tlu.

Damdawi in lama hruaia enfiah a nih hnuah Eriksen hian lung lam fel lo a nei tih hmuhchhuah a ni a, a lung pui turin ICD (implantable cardioverter defibrillator) chu a taksaah an dah.

Eriksen-a'n ICD a vuah avang hian nikum December khan Inter Milan nen inhriathiam tawnnain a contract an titawp. Italy-ah chuan thawk lama harsatna nei leh, khawl hman ngai tawhte hi inkhelh phal a ni lo.

Chance petu Bees
Kumin January thla kha chuan Eriksen hian a club hlui Ajax-ah training a zawm a, thlasik bazarah Danish midfielder hian Premier League club Brentford a zawm. Eriksen hian chawlh mai a tum lo a, FIFA World Cup-ah Denmark tana khelh a tum thu a sawi hial.

Eriksen hian London club Brentford a thlang hi a mak hran lo. Spurs player hlui a nih avangin London-ah a tlangnel a, Bees head coach Thomas Frank hi Danish mi a ni a, kum 2008-2012 chhung khan Denmark Under 17 team a lo enkawl ṭhin avangin Eriksen nen an thawk dun tawh.

Brentford-ah hian Danish mi an tam sa hrim hrim bawk a, assistant head coach Brian Riemer bakah Danish player pasarih an awm a, Denmark tana khel pha Christian Norgaard leh Mathias Jensen te pawh an awm. Bees-in risk an la a, Eriksen chance an pek avangin harsatna nei loin Premier League-ah an inhamtang.

A dam tawh
Eriksen hi Premier League match 11-ah Brentford tan a inlan a, goal khat a khung bakah assist vawi li a nei a, hmun pawimawh a chang.

Bees tan Eriksen-a'n a theihna a lantir leh a, Denmark tan pawh koh leh a ni. Denmark tan Eriksen hian kuminah match ruk khelin goal hnih a khung a, a goal khungna hi Netherlands leh Serbia an ni.

Eriksen hi lung lam harsatna a neih hmain player ṭha chungchuang a ni a, a dam tawh avangin club lian Man United leh Tottenham te an rawn lang a, Bees tan chelh a har ang.

Engtin zel?
Manchester United-in manager thar Erik ten Hag an lalut a, Dutch manager an lakluh hnuah player lakluh an la nei lo a, chhuak erawh an tam. Player langsar Paul Pogba, Edinson Cavani, Jesse Lingard, Nemanja Matic leh Juan Mata te an chhuak.

David de Gea thachhang dawltu keeper Dean Henderson pawh a khelh phakna tur zawngin Nottingham Forest-ah loan-in a kal a rinawm.

Man United hian player lakluh ngei pawh an tum a, an lakluh tum langsar ber chu Frenkie de Jong a ni. English club hian Frenkie de Jong lakluh tumin euro maktaduai 60-in Barcelona an dawr tawh a, Catalan club hian an hnawl. A ṭum hnih nan Man United hian Barca hi an dawr leh dawn niin an sawi a, Catalan club hi an sum dinhmun a ṭhat loh avangin Ten Hag-a'n Ajax-a a hman thiam sa Frenkie de Jong lakluh theihna kawng a inhawng.

English club hian Ajax aṭangin Antony lakluh tumin hma an la bawk a, a hlawhtling hnai nia sawi a ni. Brazilian winger Antony hi kum 22 mi a ni a, ram tan match kua khelin goal hnih a khung tawh. Season liam ta khan Antony hian Ajax tan match 23 khelin goal riat a khung.