Real ka cham chhunzawm dawn - Vini Jr

Vinícius Júnior chuan Real Madrid-ah a cham chhunzawm tur thu a tichiang. Brazilian forward hian season ṭha tak a hmang a, season liam ta khan Los Blancos hi La Liga leh Champions League-ah a champion pui.

Kum 21 mi Vinícius Júnior chuan, "Khawvel club ropui ber Real Madrid tan ka khel chhunzawm ang," tiin a cham chhunzawm tur thu a sawi.

Vini Jr contract thar hi July-ah an puang dawn a, June 2027 thleng daih contract ziak belh tura ngaih a ni. Real president Florentino Pérez chuan Vini Jr hi a rei thei ang ber chamtir a duh.

Brazilian forward hian season liam ta khan La Liga match 35 khelin goal 17 a khung a, Champions League match 13-ah goal li a khung bawk.