Real-in Barca an lehthal leh tawh

Spanish La Liga lamah Real Madrid leh Barcelona ten hma an inhruai chhawk zak zak reng a, tun season European top five league zinga ngaihnawm ber ang hiala chhal ngam a ni ta. 

Real Madrid hian Nilaini zan khan an mikhual Mallorca chu 2-0 in an hneh a, Vinicius Junior leh Sergio Ramos-ten goal khat ve ve an khung - mikhual team-in a chhanletna tur an nei lo. 

Zinedine Zidane-a nauten hnehna an chan leh tak avangin La Liga table chung berah an awm chhunzawm leh nghal a, an hnuaiah hian Barcelona awmin an point hmuh zat a inang. 

Mahse, European league dang ang lo takin goal difference aiah head-to-head hman a ni a, tun season an intum tawh vawi hnihah Real an chungnun zawk avangin table chung berah an awm. 

Kum 19 mi Vinicius Junior-a'n player danglam bik a nihzia a pholan chhunzawm zel a, minute 19-na lekah goal hmahruai a khung nghal - tun season-a goal nga a khungna a ni. 

Vinicius hian Luka Modric hnen aṭanga a ball hmuh ṭha tak chu 'class' zetin a 'chip' lut a, Mallorca goalkeeper tawnhriat nei ngah Manolo Reina tan pawh dan theih a ni lo. 

Brazil tana vawi khat inlan tawh Vinicius hian goal la khung pup pup lo mah se tlarhmaah Real tan player ṭangkai a ni fo a, tun ang zela hma a sawn a nih chuan khawvela footballer ṭha zingah a hming a nem kai thuai ang. 

Vinicius hian season hmasa khan senior team leh reserve team tan khel kawpin hun a hmang a, tun season-ah erawh Zidane tan player pawimawh a ni phak - a chanchin kan la hre dawn chauh.  

Real Sociedad lakah Ramos-a'n La Liga-a defender goal khung hnem ber record a siam a, Mallorca lakah pawh Spanish defender hian insum a tum chuang lo - tun season-a a goal 10-na a khung!

Ramos hian minute 56-naah an goal hnihna hi freekick aṭangin chiang zetin a khung a, defender danglam bik a nihzia a pholang nawn - season hmasa khan inelna hrang hrangah goal 11 khungin season khata a goal khung hnem ber ṭum a ni a, ama record khum thei dinhmunah a ding mek. 

Real tan hian February hnua a vawi khat nan Gareth Bale chuan inkhel bul a ṭan a, Welsh forward hian minute rukna lekah goalkeeper Manolo Reina-a enchhin tih loh chu hlauhawm a siam meuh lo. 

Hetihlai hian Chelsea forward hlui Eden Hazard leh Karim Benzema te chuan chance duhawm an nei ve bawk a, mahse an hun ṭha neih hi goal-ah an chantir thei lo thung.