Juve chak zawh loh zanah Inter chak

Serie A champion Juventus tan season duhawm a ni rih lo. Andrea Pirlo naute hi an mikhualna ramah Benevento nen 1-1 in an inhnehtawk a, tun season league match vawi kua an khelh aṭangin chak loh la nei lo mah se, vawi nga ngawt an khingpui nen an inhnehtawk.

Inrinni zan inkhel dangah Inter Milan erawhin an elpui Sassuolo 3-0 in an luhchhuah a, tun hnaia sawisel hlawh Antonio Conte naute hian point 18 neiin table-ah pahnihna dinhmun an luah, an chungah AC Milan chauh an awm.

Khualmualah Juventus hian Cristiano Ronaldo chu hah-chawlhna hun an pe a, an hruai ve lo. Gigi Buffon leh Merih Demiral te hliam vangin an inlan thei lo a, defender pawimawh Leonardo Bonucci erawh a inlan thei leh tawh thung.

Season duhawm hmangtu Alvaro Morata-a'n minute 21-na lekah goal hmahruai a khung, Spanish striker hian khung belhna hun ṭha nei chhunzawm mah se a hlah. Paulo Dybala leh Aaron Ramsey te pawhin an hun ṭha neih an chhawr ṭangkai thei bik lo.

Chawlhlawk hman hma deuhin Juve keeper Wojciech Szczesny chuan midfielder Pasquale Schiattarella khung tur ṭha zetin a dansak a, mualneitu Benevento khel ṭha zuiin corner an hlawh chhuak.

Corner aṭanga ball lo kal chu Barcelona midfielder hlui Arthur-a'n a pet chhuak fuh tawk lo a, hun remchang hmutu defender Gaetano Letizia chuan chiang zetin a khung, minute 90 chhungin goal dang a luh belh tawh lo.

Serie A match kua an khelh tawhah Juventus an la tlawm lo, mahse point 17 chauh la hmuin pangana an ni - an point neih zinga point thum hi Napoli inlan theih loh vanga an pek kha a ni bawk.

Old Lady manager Pirlo chuan, "Inkhel thunun tak chungin hun ṭha pawh kan insiam thei, mahse chak nemngheh theihna hun ṭha kan neih kha kan chawr ṭangkai thei tlat lo a ni. Kan goal chhuah dan kha fimkhur ila chuan ven theih a ni tih pawh a lang.

"International match a awm a, chumi hnuah Serie A leh Champions League a awm bawk. Inkhel zawng zawngah player ṭha chhawr vek theih a ni lo, insiamṭhatna tur leh siamrem tur lai tam tak a la awm," a ti.

Turin club hian Nilaini zanah UCL group match khel turin Dynamo Kiev an mikhual zui leh dawn, last 16 lut chiang tawh mah se group hmahruaitu nih an la beisei avangin chak tumin an inlan ang.

Champions League lama beisei an phak loh avangin Conte dinhmun a derthawng a, Italian manager hian an ban a nih chuan ama mawhphurhna a nih tur thu a sawi hial. Sassuolo mualah erawh duhthusama ṭhain an khel a, point thum an hlawh chhuak.

Team pahnih hi an intawn hma chuan Sassuolo hi table-ah an chungnung zawk. Season hmasa pahnihna Inter an zam phah chuang lo, Alexis Sanchez (4'), Vlad Chiriches (14', own goal) leh Roberto Gagliardini (60') ten goal an khung.

Conte chuan, "Thil hi a lan anga awlsam vek a nih loh chang a awm, tun inkhel bikah khan 100% rilru pe chungin point thum kan hmu. Match dangah erawh rilru zawng zawng pe chunga point kan hmuh loh chang a awm ve bawk," a ti.

Inter hian Nilaini zanah UCL khel turin Borussia Monchengladbach an lenchilh dawn, last 16 lut tur chuan hnehna chang pawh ni se midang inkhel result an ngaihchan tel a ngai tawh. Season hmasa khan UCL group stage paltlang zo loin Europa League an khel zui tawh.