Khunghran laiin training thei dawn

Australian Open 2021 atan inbuatsaihna a kal zel a, inelna neihna tur state Victoria sorkar chuan tennis player tan ngaihhnathiamna a ti chhuak a, ram dang aṭanga zin lutte chu khunghran an nih lai pawhin an training phalsak an ni.

Tennis season khat chhunga Grand Slam hmasa ber hi January 18-31 chhung hian Melbourne khawpuiah khelh a ni dawn. Player inlan tum tan chuan inbuatsaihna neih a ngai tawh.

Season kal laiah Covid-19 vangin tennis a buai hle, player tam tak chuan inelna lian leh ngaihhlut US Open leh French Open pawh an khel ngam lo hial. Season tharah pawh hri leng hian nghawng a la nei rih dawn a ni.

Tennis Australia chuan sorkar hnenah player tana ngaihhnathiam dilna hi an thlen, inelna buatsaihtu lam duh leh beisei angin thil tihsak an ni. Amaherawhchu season dang angin mahni duhna hmuna thlen leh tei kual a rem dawn lo, hmun khatah an awm khawm ang.