Zahna kawnah Crystal Palace 3-0 Arsenal

"A harsa tawh ngawt ang," tih thu hi Crystal Palace 0-3 a an hneh loh hnua Arsene Wenger-a'n season thar Champions League khelh chungchang zawhna a chhanna a ni.

Wenger hian tun hnaia khualmuala Premier League match a khelh hnuhnung paliah a naute a tlawmpui vek! North London club a enkawl tawh chinah a record chhiat ber ṭum a tawng.

Selhurst Park-a inkhelah Palace tan Andros Townsend, Yohan Cabaye leh Luka Milivojevic ten goal khungin Sam Allardyce-a'n a naute chu season thara Premier League khel zui thei tur dinhmunah a awmpui chhunzawm. Palace lawmna hi Gunners chhungkaw ṭahna leh inpumkhatna tichhetu mai a ni ta!

Tlarhnung pawp
Wenger-a'n an match hnuhnung bera West Ham 3-0 a hnehtu aṭangin player pakhat chiah a siksawi. Alex Iwobi aiah Francis Coquelin chuan inkhel bul a ṭan a, kumin kumthar zan an intawn ṭuma scorpion kick ropui hmanga goal khungtu Olivier Giroud chu bench-ah ṭhut nawn tir a ni.

Captain Laurent Koscielny hliam vangin a la khel thei lo chhunzawm a, tlarhnung laiah Gabriel Paulista a ding thung. Big Sam-a'n huaisen tura a fuih Palace player ten an mikhual an hlau lo, top flight match 12 chhunga an la hneh ngai loh hi inkhel ṭan aṭangin chak tumin an nawr ngam.

Gunners midfiled inthlahdah karah Wilfried Zaha-a'n mual veliam sir aṭangin ball a cross a, minute 17-naah vengtu nei lo Yohan Cabaye-a'n hnai tak aṭangin goal hmahruai a khung - box chhungah Arsenal player paruk ten Palace player pathum an veng hneh lo!

Season kal laia Arsenal tana goal khung hnem ber Alexis Sanchez-a'n an si phurh sutna hun ṭha vawi hnih a neih a chhawr ṭangkai lo. Chile international forward ball pet hi goal hrulah a kal bakah Palace keeper Wayne Hennessey-a'n ṭha takin a dan sak.

Second half-ah goal phur zawk Arsenal an tho chhuak thei lo, inkhel pumpuiah ball possession 72% zet chang chung siin chawlhlawk hnuah Palace goal zawnah an pet miah lo! Midfielder khel ṭha tluang Zaha chuan Cabaye goal khung tur siamsak lehin Luka Milivojevic-a'n penalty aṭangin an goal thumna a khung bawk.

Mangchhia...
Kum 1995 khan Stewart Houston kaihhruaina hnuaiah Arsenal hi khualmualah a zawnin league match li chhung an tlawm tawh a, he mi hnuah chuan tun ṭum hi an result chhiat zawn rei ber ṭum a ni. Kum 1929 September thla hnuah a zawnin khualmualah goal thum an chhuah tlin lehna hmasa ber a ni bawk.

Arsenal hian match 30 khelhah point 54 hmuin table-ah parukna an ni a, an chung chiaha awm Manchester United aiin point thumin an hniam zawk; palina Manchester City chu point sarihin an phak lo bawk - match riat bak khelh tur an nei tawh lo.

A zawna season 20 chhung Champions League khel tawh Wenger chuan, "A harsa tawh ngawt ang," tiin Europe club liante inelna sang ber khelh a beisei tam tawh lo. Wenger hian inbuatsaihna ṭha tak an nei chunga result ṭha an nei thei lo chu hriatthiam a har bakah a lungchhiat thlak thu a sawi tel bawk.

Kum 67-a upa Wenger-a'n inkhelh ṭan hmain an harsatna lak aṭanga tal chhuak tur chuan 'inpumkhatna' an mamawh thu a sawi, khelmual chhunga an chet dan avangin a thusawi hian awmzia a nei thei rih lo.

Arsenal fan-te chuan an manager bang tura an duh zia an lantir leh a, defender ṭhangduang Hector Bellerin chu ball an pek kir mai loh bakah 'Arsenal kawr ha turin i ṭha tawk lo,' tiin an au el hial! Bellerin laklet duhtu Barcelona tan Gunners fans chet dan hi hmuh a hrehawm hran lo ang.

Defender rinrawl Koscielny awm loh laiin Gunners hian hotu an nei lo, khelmual chhungah an inpumkhat lo tih a lang chiang; attacking game mawi khel ṭhin hian mumal leh pangngai takin an khingpui goal an nawr theih loh bakah goal an phurh hnuah huaisen taka an sual let hmuh tur a awm lo - chak duhin an tuihal lo, tun hma lama kan hmuh ṭhin Arsenal kha an ni tawh lo.

Arsenal hian harhtharna mak an chang a nih a, club dang in result ṭha lo an nei a nih ngawt loh chuan an duh lohna hmunah an awm dawn chiang tawh. Premier League manager zinga hna ngai chelh rei ber leh dinhmun derthawnga ding ngai lo Wenger hian season tharah North London club hi a enkawl zui tawh lo a nih pawhin a mak lo ang.

Big Sam a lian
Nikum December thla khan Crystal Palce chuan Alan Pardew thlak nan Sam Allardyce an lalut. England boss hlui hian a tir lamah beisei a phak lo a, league match a khelh pui hmasa pasarihah vawi ruk a tlawm.

Bolton, Blackburn, Newcastle leh Sunderland te inhamtan pui tawhtu Big Sam hian tun hnaiah a naute result ṭha a neih pui leh ta. An league match hnuhnung parukah ṭum thum clean sheet an nei thei. Arsenal lakah team huaisen an nih zia an lantir thei a, an goal an venhim ṭhat bakah a ṭul hunah an nawr ngam bawk.

Kum 62-a upa Allardyce chuan, "Ka naute khan Arsenal hneh dan tur an hria, a pawimawh hmasaah chuan kan goal venhim a ni. Chumi hnuah Arsenal player-te chhaih thinrim a ni bawk, a bik takin an tlarhnung lai kha an khawng lo tih kan hriat avangin an chak lohna laiah kan bei," tiin a sawi.