Mohun Bagan kawngah Lajong Aizawl FC tan kan khel ang - Isaac & Samuel
Mohun Bagan-in I League-a an match hmabak paliah hnehna an chan vek chuan an champion dawn a, Aizawl FC nomawi beiseina a thamral ang.
Mariners hian vawiin tlai dar 4:35 hian Shillong Lajong an hmachhawn dawn a, Isaac Vanmalsawma leh Samuel Lalmuanpuia te chuan Mizo club champion kawng sialtu an nih theih dawn avangin an theihna zawng zawnga an khelh tur thu Vanglaini an hrilh.
I League inkhel pawimawh tak hi Ten 2-ah a en theih dawn. Mariners hian point 29 an hmu tawh a, Lajong laka point an hmuh hrim hrim chuan Aizawl FC (30 pts) hmahruaitu nihna an chhuhsak ang.
Bagan kawng chu
Kolkata Derby-ah Mohun Bagan-in an hmelma East Bengal 2-1 in an hneh a, Kanchenjunga Stadium-a hnehna hi Mariners phurna belhchhahtu tur a ni. Inkhelh banah Sanjoy Sen chuan, "Siliguri-ah hnehna ka la chang ngai lo a, hlawhtlinna chang tur chuan hetiang sulhnu chhinchhiahtlak loh nuai reh hi a ṭul a ni," tiin nomawi chawi tura kawng harsa paltlang a ṭul thu a sawi.
Bagan hian tun season-ah Shillong Lajong hi an mualah an hneh tawh a, amaherawhchu season liam ta khan Lajong hian Federation Cup leh I League-ah Mariners hi an mualah an inhnektawkpui ve ve. Sanjoy Sen-a hote hian Shillong-ah sulhnu ṭha hnutchhiah an tum dawn a, vawiin tlai inkhel hi champion hril theitu a nih avangin Aizawl FC leh East Bengal ten an ngaihven ang.
Kolkata Derby a hahthlak bik avangin hemi zawh chiaha result ṭha neih hi Bagan tan a harsa dawn a, Lajong laka an tlawm a nih chuan April 15-a Churchill Brothers an tum lehnghal tur hi a awlsam dawn lo. Hei chauh hi a ni lo, April 22-a champion tura an elpui Aizawl FC an hmachhawn hmain AFC Cup-ah Maldives club Maziya an la mikhual dawn bawk.
Mizo tlangval Jeje Lalpekhlua chuan, "East Bengal kan hneh avangin kan dinhmun a ṭha a ni thei a, amaherawhchu khelh tur kan ngah avangin champion tur hi la chiang lo a ni. Lajong hi an mualah chuan khelh an harsa em em a ni," tiin inchhuang thei an la nih loh thu Vanglaini hnenah a sawi.
Mizo tan Mizo
Mizo footballer-ten an club khelhna tana an theihna zawng zawng an chhuah hi an tihtur hmasa ber a ni a, hemi tichung si hian Mizo tlangval pahnih Isaac leh Samuel te chuan Aizawl FC tana khel turin an inpeih tawh hle.
Hnahthial tlangval Isaac chuan, "Mohun Bagan hi team ṭha tak an ni a, nawr pup pup hran lo mah se an player-te theihna a san avangin an chance neih chhun hi an khung mai ṭhin. Foreigner an nei ṭha a, Jeje bakah tlarhma dang te hi hun awl pek a thiang lo a ni. Chutihrualin kan muala khel tur kan nih avangin kan hneh thei turah ka ngai a, kan club tan Bagan hneh hi a pawimawh ang bawkin Aizawl FC champion-na kawng sial theitu a nih avangin ka theihna zawng zawng ka pe ang," tiin Mizo club tana ke a pen tur thu Vanglaini a hrilh.
Zemabawk North tlangval Samuel-a chuan, "I League hi a awm zel ang em tih hi hriat a ni lo a, kumin a tawpna a ni thei. Mizo club-in India ram league sang bera history ṭha tak a neih hi ka duhsak pui hle a ni. Inkhel zawng zawngah theihtawp kan chhuah ṭhin a, Mohun Bagan nen hi chuan theihtawp bakah tlem kan chhuah ang," tiin Aizawl FC champion kawng sialtu nih a tum thu a sawi.
Shillong Lajong hian an match hnuhnung berah DSK Shivajians 3-2 in an hneh a, hemi ṭum hian Mizo tlangval pahnih Isaac leh Samuel te hian goal khat ve ve an khung.