AIFF leh MFA buatsaih Futsal Workshop

All India Football Federation-in India rama Futsal mumal zawka kalpui a tumna kal zelah, AIFF leh Mizoram Football Association ṭangkawp chuan April 18, 2017 hian Rajiv Gandhi Stadium, Mualpui, Aizawlah Futsal lam zir chianna leh bul ṭanna tur hun a buatsaih dawn.

Fulsal bul ṭanna dik

AIFF-in Mizorama Futsal bul a ṭanna tura inbuatsaihna hi a hmingah, "Futsal Introductory Workshop" tih a ni. Resource person atan Sanjay Kumar, AIFF Senior Mana­ger, Competitions a lo kal dawn a, ani hi Asian Football Confe­derations hnuaia Futsal leh Foot­ball-a Match Commissioner a ni.

Sanjay hi Asia ram hrang hrangah AFC Futsal Competition hrang hrangah match commi­ssioner a ni ṭhin a, Mizo­ramah hian FIFA dan leh AFC leh AIFF duh anga Futsal bul ṭan dan tur a rawn kawh hmuh dawn a ni.

Amah hi tun I League season ṭan hmaa Mizorama lo kala Rajiv Gandhi Stadium line rin hrang hrang dik tawk lo tia rawn rin ṭhat puitu kha a ni a; AIFF hnuaia Match Commissioner hrang hrangte training pe ṭhintu a ni.

Futsal leh a zir tur

He hunah hian thupui hrang hrang - Futsal Laws of the Game, Futsal in Asia, History of Futsal, Comparision between Futsal and Football leh a dangte a zirtir dawn a, practical pawh tih tur a ni ang.

AIFF chuan "Futsal Intro­ductory Workshop" neih zawh hian a tahtawlin Futsal Referee Instructor leh Technical Expert pawh an rawn la tir leh dawn a, India ram pum huap Futsal inelna an siam dawn a ni.

India ramah kumin aṭangin AIFF chuan Futsal hi mumal zawka kalpui a tum a, March 23, 2017-a AIFF Executive Committee meeting chuan AIFF Futsal Committee a din a, Mizoram chhunga Futsal kalpui turin MFA pawhin tun hnai khan MFA Futsal Committee a din thar bawk.

MFA Futsal Cup 2017 chu May 4 aṭangin Aizawlah khelh a ni dawn a, hemi atan hian eng team pawh tel theih niin April 11-28, 2017 thleng MFA Office, City Park-ah entry fee a pek theih.

Tu pawh a tel theih

"Futsal Introductory Work­shop" ah hian a duh apiang tel theih a ni a, FIFA dan hnuaia AIFF leh MFA hriatpuia Futsal inelna buatsaih duhtu, Futsal referee tura inchher duh leh Futsal tuipuitu tu pawh tel theih a ni.

He workshop-a tel duhte chu MFA Office, City Park-ah April 12-17 inkarah office hun chhungin registration fee Rs 50/- pein a inziah luh theih a, MFA Futsal Committee chuan Futsal lama tui mi tu pawh tel turin a sawm.