Jerusalem-a inbeihnaah mi 14 hliam
Jerusalem-ah an ram huna nimin zing dar 1:45 vel khan tu tih hriat loh ten car hmangin First Station bula bus station-a mipui awmna chu an bei thut a, he inbeihnaah hian mi 14-in hliam an tuar a ni.
He thil thleng hi tute tih nge hriatchian la ni lo mah se, police lam chuan firfiakte chetnaah an ngai tih an tarlang. Chhiat tawhna thlenna hmun hnaia nightclub hmingthang tak chu firfiakte chuan car hmanga beih an tum niin emergency service lam chuan an tarlang.
Inbeihna thlengah hian thi an awm lo a, mahse hliam tuar zinga kum 20 mi chu a dinhmun a ṭhat loh avangin a rang thei ang bera Shaare Zedek Medical Center panpui nghal a nih thu leh midang 13-te chu hliam na vak lo tuar mah se damdawi-in panpui an nih bawk thu emergency service-te chuan an sawi.
He chhiat tawhna thlen chhan hi kar liam taa US president Donald Trump-a'n 'Middle East peace plan' a puan zarnaah, Jerusalem chu Israel khawpui a nih thu a sawi hawng kal zel niin media-te chuan an tarlang thung. Palestine ram chuan Trump-a peace plan hi a pawm ve lo a, Israel lam a ṭan lutuk nia sawiin an hnawl sak a ni.